Arbor

De Vicipedia
Jump to navigation Jump to search
La arbor "Jeneral Sherman", posible la arbor la plu grande en volum

En botania, un arbor es un planta peren con un tronco, ramos suportante, e folias en la plu de spesies. Arbores no es un grupo tasonomial, ma inclui un varia de spesies de plantas cual ia evolui autonom un tronca leniosa e ramos como un modo per tori supra otra plantas per compete per lus de sol. Arbores tende vive longa, algas ateninte miles de anios. Definida plu vasta, palmas plu alta, filises arborin, bananas, e bambus es ance arbores. Arbores ia esiste per sirca 370 milion anios. On estima ce on ave plu ca tre trilion arbores matur en la mundo.

La majoria de spesies de arbores es anjiospermas. On ave ance sirca un mil spesies de arbores gimnospermal, incluinte coniferes, sicadas, gincos, e gnetos: los produi semes no caxida en frutas, ma en stutures abrida como conos, e multe ave folias dur e sirin, como la agos de pinos. La plu de anjiospermas es eudicotas, con du cotiledones. On ave ance alga arbores de linias vea de plantas florinte nominda anjiospermas basal o paleodicotas; estas inclui amborelas, magnolias, muscadas, e avocados. Arbores como bambu, palmas, e bananas es monocotas.