Anakin Skywalker

De Vicipedia
Jump to navigation Jump to search

Anakin Skywalker ia es un de la jedis la plu famosa e potiosa en la universo de Star Wars. El ia nase sur la planeta Tatooine, fio de Shmi Skywalker, un sclavo. Ance Anakin ia nase como un sclavo, e ia labora en un boteca per robotes e partes de macinas. Ma el ia ave un potia grande, cual ia es sensada par la jedis Quai-gon Jinn e Obi-wan Kenobi cuando los ia visita la planeta per repara sua barcon spasial. Par un jua de corsa en cual Anakin ia gania, el ia oteni sua libria, e ia vade con la du jedis a la planeta Coruscant, la sentro de la impero, conteninte la templo de la jedis.

A la ves prima cuando Anakin ia visita la templo, la otra jedis ia es impresada par sua potia, ma ia pensa ance ce el es tro vea per es instruida (alora, on ia instrui jedis a eda multe joven), ce la potia de Anakin va pote es perilosa, e ce sua futur es nonserta. A contra, Quai-gon Jinn ia vole ce on instrui Anakin, e ante sua mori ia dise a sua padawan (studiante) ce Obi-wan debe instrui el. Donce Obi-wan ia dise esta a la consilio, e vidente ce los no va pote cambia sua opina, la jedis de la consilio ia acorda ce Anakin ta deveni un jedi.

Tra multe anios, Anakin ia es instruida par Obi-Wan Kenobi, e ia deveni plu e plu potiosa. En la serie du de filmas, el ia apare como joven e potiosa, ma ance como un studiante alga nonstable. Cuando el ia es joven, Anakin ia deveni enamada par la rea elejeda Padmé Amidala. Pos fini sua periodo como rea, Amidala ia deveni un senator e ia encontra alora Anakin a la ves du.

Como un jedi, Anakin no ia es permeteda a ama e ave lias emosial o material. Ma el no ia pote resiste, e cuando el ia proteje la senator Padme como un jedi joven, el ia parla a multe veses a Padme sur sua ama a el. Final, la du persones ia deveni enamada, e ia deside continua secreta sua relata.