Alcerce

De Vicipedia
Jump to navigation Jump to search
Omes juante alcerce, de la Libro de los juegos
La table e la pesos a la comensa de la jua

Alcerce es un jua de stratejia cual probable orijina en Asia sude-ueste. Lo es la asendente de damas e fanarona.

La jua no apare en leteratur asta la sentenio 10 tarda, cuando la autor irani Abu al-Faraj al-Isfahani ia refere a lo es sua obra de 24 volumes Kitab al-Aghani ("la libro de cantas"). Ma esta obra no inclui la regulas de la jua. La jua ia es introduida a Europa de Maroco. Regulas pote es trovada en la Libro de los juegos ("libro de juas"), encarfada par Alfonso 10 de Castelia en la sentenio 13.

Ante comensa, cada juor pone sua 12 pesos en la du linias plu prosima a se e en la du cuadros en la linia sentral a la plu destra, con un juor usante la pesos blanca e la otra usante la pesos negra. La jua progresa en turnos seguente la regulas:

  • Un peso pote move de sua cuadro a cualce cuadro juntada (ortogonal o diagonal).
  • Un peso pote salta supra un peso oposante e sutrae lo de la jua, si la peso oposante es juntada e la cuadro ultra lo es vacua.
  • Saltas multiple es permeteda, e an esijeda si posible.
  • Si un catura es posible, lo debe es fada, o la peso es sutraeda.
  • La gol de la jua es la elimina la pesos de sua oposor.

Plu regulas ia es introduida par R. C. Bell1 per boni la jua:

  • Un peso no pote move a retro, pe el pote move a cualce de la 3 cuadros a ante e la 2 cuadros a la destra o sinistra.
  • No peso pote reveni a la cuadro el ia ocupa a pasada.
  • Cuando un peso ia ateni la linia plu distante (pd la linia prima de la oposor), el pote move a retro sola si lo pote catura pesos oposante.
  • La jua es ganiada si la juor oposante ia perde tota de sua pesos, e si el no pote move.

1Bell, R. C. (1979). Board and Table Games from Many Civilizations, volum 1. New York City: Dover Publications.