Africanses

De Vicipedia
Jump to navigation Jump to search
Africanses
Afrikaners
Andries Pretorius.jpgJan SmutsPetrus Jacobus JoubertCharlize Theron
Andries Pretorius · Jan Smuts · Piet Joubert · Charlize Theron
Popla 3.5 milion
Loca Sudafrica, Namibia, Zambia, Botsuana, Sauaziland, Australia, Zeland Nova, Arjentina
Relijio Calvinisme
Lingua Africans
Poplas relatada Nederlandes, flameses, frisces

La africanses es la etnico sudafrican cual desende xef de la colonistes nederlandes prima ci ia ariva a Sudafrica en la sentenios 17 e 18. Los ia domina tradisional la cultivas e la politica ante 1994. Sua propre lingua, africans, es la lingua tre de la plu parladas en Sudafrica. Lo ia evolui de la nederlandes demotica de Nederland sude, ajuntante parolas traeda de la Indias Este Nederlandes (oji Indonesia) e de Madagasicara par la sclavos. La africanses es 5,2% de la popla intera de Sudafrica, longo la cuantia de sudafricanes blanca ci parla africans como lingua prima en la conta de abitores nasional de Sudafrica de 2011.

La ariva de la esploror portuges Vasco da Gama a Kolkatta en 1489 ia abri un porteta de asede libre a Asia de Europa ueste a sirca la Capo de Bon Espera; an tal, lo ance ia nesesa la fundi e securi de stasiones de comersia en la este. Multe rapida un potia european ia segue la otra, tota zelosa per comersia longo esta ruta. La portugeses ia ariva en la baia Mossel en 1500, los ia esplora la baia Table du anios a pos, e en 1510 ia comensa atacante la tera interna. Corta pos la Republica Nederlandes ia envia barcones mercator a Barat, e en 1602 ia fundi la Vereenigde Oostindische Compagnie (Compania Nederlandes de Barat Este; VOC). Como la volum de trafica a sirca la Capo ia crese, la Compania ia reconose sua porto natural como un loca per furni se con acua per viajas longa sirca Africa a la Este e ia institui un posto per furni comeda en 1652.