Acorda Schengen

De Vicipedia
Jump to navigation Jump to search
Schengen Agreement (1985) signatures.jpg

La Acorda Schengen [xengen] es un trata cual ia gida a la crea de la Area Schengen en Europa, en cual on ia aboli jeneral la controlas a fronteras interna. Lo ia es suscriveda a 14 junio 1985, prosima a la site de Schengen, en Luxemburg, par sinco de la des statos de lo cual ia es alora la Comunia Economial European. Lo ia proposa medias intendeda per aboli gradal la controlas a la fronteras compartida de la paises suscrivente. La medias ia inclui la armoni de politicas de visa, e la introdui de esaminas de veculos a rapida reduida, permetente ce on traversa fronteras sin para e ce persones ci abita prosima a un frontera traversa en un loca otra ca un punto definida de controla.

En 1990, la Acorda ia es aumentada par la Trata Schengen, cual ia proposa un politica comun de visa e la aboli completa de la controlas sistemosa a fronteras interna. La Area Schengen funsiona multe simil a un stato unida en relata a viajas internasional: lo ave controlas de frontera esterna per viajores ci entra a lo e sorti de lo, e visas comun, ma lo ave no controlas de frontera interna. Lo es composada de 26 paises european, covrente un popla de 400 milion persones e un area de 4 312 099 cilometres cuadrida.

Orijinal, la acordas Schengen (e la regulas adotada su los) ia funsiona autonom de la Uni European. An tal, en 1999, los ia deveni un parte de la leges de la UE con la Trata Amsterdam, ma on ia permete ancora la nonpartisipa de la sola du statos membros de la UE cual ia resta estra la Area: Er e la Rena Unida. Schengen es aora un parte sentral de la leges UE, e on obliga la partisipa de tota statos membros cual no ia junta ja se a la Area Schengen (e no ave la permete de nonpartisipa) cuando alga esijes tecnical es sasiada. Alga paises de estra la UE es incluida en la area.