Xace acaso de Fischer

De Vicipedia
Jump to navigation Jump to search

Xace acaso de Fischer (acc Chess960) es un varia de xace inventada par la campion de la mundo de xace, Bobby Fischer. El ia presenta sua varia sur 19 junio 1996 a La Plata, Arjentina. La jua usa la mesma table e pesos como xace moderna, ma la locas inisial de la pesos major es acaso, seguente alga regulas. Esta comensa resulta en un jua cual depende plu sur talento spontan ca sur memoria de comensas fisada.

La usa de ordinas acaso de la pesos major ia es ja conoseda como xace acasida, cual ia es sujestada tan temprana como 1792, e juada tan temprana como 1842. Ma Fischer ia desira regulas de ordinas diferente, cual pote conserva la natur de la jua par reteni bispos sur colores oposante e la direto de "roca". La resulta ia es un jua con 960 ordinas posible per la comensa de la jua.

Un esemplo de un ordina inisial en xace acaso de Fischer

Ante la jua, un ordina inisial (per blanca) es determinada acaso, con alga comandas:

  • La bispos debe es poneda sur cuadros de colores oposante;
  • La re debe es poneda sur un cuadro entre la du tores;
  • La pesos de la armada negra es poneda como la imaje mirorida de los de blanca;
  • La peones es poneda a la linia de la juores, como en xace moderna.

On ave donce:

  • 4 cuadros posible per la bispo de cuadros pal;
  • 4 cuadros posible per la bispo de cuadros oscur;
  • 6 cuadros restante per la rea;
  • 10 modos per pone la du cavalores entre 5 cuadros.

Esta jenera 4 × 4 × 6 × 10 = 960 posible ordinas inisial. Esta ance furni un modo fasil per acasi la ordina, par usa dados.

Cada juor pote roca un ves per jua. Fischer ia reinterprete la modo de roca par sujesta ce la locas resultante de la re e tore es esata la mesma como los en xace moderna, pd:

  • A la lado sinistra (de blanca), la re fini sur la colon c, e la tore fini a la colon d;
  • A la lado destra (de blanca), la re fini sur la colon g, e la tore fini a la colon f.

En la estate de 1993, Bobby Fischer ia visita Laszlo Polgar e sua familia, un mestre de xace e la autor de la libro Xace reformida, un studia de varias de xace. La tre sores de la familia - Judit Polgar, Susan Polgar, e Sofia Polgar (tota instruida en xace par sua padre, e se mesma mestres de xace) - ia jua multe juas de la xace acaso cual Fischer ia inventada. A un punto de la sera, Sofia ia defeta Fischer en tre juas en ordina!

Fischer no ia es plaseda cuando Lazlo, la padre, ia mostra a Fischer un libro vea de sace cual descrive de un presedente de xace acaso. La libro, Šahovska abeceda, ia es scriveda par Izidor Gross (ance un mestre de xace) e publicida en 1910. Bobby alora cambiada la regulas de sua varia per difere sua varia de la varia de Gross. Fischer ia es famosa per sua tempera.