Veria

De Vicipedia
Walter Seymour Allward, Veritas, 1920

La veria es la cualia de acorda con fatos o realia, o de conforma a un norma o model orijinal. Lo es usual regardada como la oposada de falsia.

On discute e debate la conseta de veria en contestos diversa, incluinte filosofia, arte e relijio. Multe atas umana depende de lo, incluinte la siensas, la lege, jornalisme e la vive comun; esta atas presuposa la esiste de la veria como un conseta, sin trata lo como un tema de discute. Alga filosofistes regarda la conseta de veria como fundal, e nonesplicable en termas plu fasil ca la conseta mesma. Comun, on regarda la veria como la coresponde de linguaje o pensa a un realia nondependente.

Teorias e opinas diversa de la veria es ancora debateda entre eruditas, filosofistes e teolojistes. Linguas e parolas es un media par cual umanas espresa informas a lunlotra, e la metodo cual on usa per deside lo cual es vera es nomida un criterio de veria.

Respondes diversa esiste a esta demandas: De cual la veria es composada? Cual cosas es capas de es vera o falsa? Como on defini, identifia e distingui la veria? Cual es la roles de sabes empirical e sabes fundida en crede relijial? Esce la veria es sujetal o ojetal? Esce lo es relativa o asoluta?