Uigur (popla)

De Vicipedia
La distribui de la popla uigur (roja; area rarida en ros) en Xinjiang
Un fem joven uigur

La uigures (ۇيغۇرلار‎, уйғурлар, 維吾爾) es un etnico turcica orijinal de e cultural liada con la rejion jeneral de Asia sentral e este.

Los es reconoseda como nativa a sola un rejion, la Rejion Autonom de Uigur en Xinjiang de la Republica de la Popla de Xina. Lo es un de la minorias etnica ofisial reconoseda de Xina. Sirca 80% de la uigures de Xinjiang abita ancora en la Basin de Tarim. La resta de la uigures abita en Urumci, la site capital de Xinjiang, en la rejion istorial de Dzungaria.

Tradisional, la uigures ia abita en un serie de oasises sperdeda tra la Deserto Taclamacan, cual composa la Basin de Tarim. Esta teritoria ia es controlada istorial par multe sivilias, incluinte Xina, la mongoles, la tibetanes, e tribus variosa de turcicas. La uigures ia comensa deveni muslim en la sentenio 10 e ia deveni xef muslim per la sentenio 16. Islam ia ave un rol importante en la cultur e identia de la uigures. La plu de uigures moderna es suni, ma alga nonacordas esiste entre la ordinas relijiosa de sufis e nonsufis. La pratica de relijio varia entre rejiones.

Un studia (2013) de ADN autosomal ia mostra ce la uigures tipal es la plu prosima a otra popla turcica en Asia sentral e Xina. Analise de la diversia de sitocroma B ia sujesta ce los es plu prosima a la popla xines e sibir ca la grupos european en Asia ueste o Europa. Un studia de ADN mitocondrial (2013), pd matrilinial, ia trova ce la frecuentia de aplogrupos ueste es sirca 42.6%, e de la aplogrupos de Asia este es sirca 57.4%. Un studia de ADN padral (2016) mostra ce la aplogrupos ueste composa entre 65% e 70%, e la Asia este entre 30% e 35%.

La lingua uigur es clasida su la ramo carluc de la familia de linguas turcica. Lo es relatada prosima a aynu, lop, ili turci, e txagatai (la linguas carluc este) e relatada alga min prosima a uzbec (carluc ueste). La lingua es aglutinante e ave un ordina de parolas de sujeto-ojeto-verbo. Lo ave armonia de vocales como otra linguas turcica, e lo ave casos de nomes e verbos, ma no ave la distingui entre seso. La uigures ia adotada scrives variosa per sua lingua, incluinte arabi, cirilica, e latina.

De 2016, on ia estima ce plu ca un milion uigures ia es detenida en la campos de reeduca en Xinjiang. Seguente la regulas de la governa xines, la cualia xef de la campos es per garantia adere a la ideolojia de la partito comuniste xines. Departe volente de la campos no es posible, e persones es detenida per a min 12 menses, dependente de sua atenis sur esaminas de ideolojia xines. Comunica entre prisonidas e sua familias es limitada a un telefoni per semana. En 2017, la organiza Vijila de Diretos Umana ia relasa un reporta cual dise ce "la ajentes de la governa xines debe relasa direta la persones retenida en sentros nonlegal de 'educa political' en Xinjiang, e la sentros debe es cluida". En novembre 2019, 1 en 10 uigures ia es detenida en esta campos.

Referes sur jenetica[edita | edita la fonte]

  • Xu S, Huang W, Qian J, Jin L (April 2008). "Analysis of genomic admixture in Uyghur and its implication in mapping strategy". American Journal of Human Genetics. 82 (4): 883–94.
  • Shuhua Xu & Li Jin (September 2008). "A Genome-wide Analysis of Admixture in Uyghurs and a High-Density Admixture Map for Disease-Gene Discovery". Am J Hum Genet. 83 (3): 322–36.
  • Li, H; Cho, K; Kidd, JR; Kidd, KK (2009). "Genetic Landscape of Eurasia and "Admixture" in Uyghurs". American Journal of Human Genetics. 85 (6): 934–7, author reply 937–9.
  • Ablimit, Abdurahman; Qin, Wenbei; Shan, Wenjuan; Wu, Weiwei; Ling, Fengjun; Ling, Kaitelynn H.; Zhao, Changjie; Zhang, Fuchun; Ma, Zhenghai (2013-10-09). "Genetic diversities of cytochrome B in Xinjiang Uyghur unveiled its origin and migration history". BMC Genetics. 14 (1): 100.
  • Yao YG, Kong QP, Wang CY, Zhu CL, Zhang YP (Dec 2004). "Different matrilineal contributions to genetic structure of ethnic groups in the silk road region in China". Mol Biol Evol. 21 (12): 2265–80.
  • "Male Demography in East Asia: A North–South Contrast in Human Population Expansion Times" (PDF). genetics.org.