Thomas Alva Edison

De Vicipedia

Thomas Alva Edison (1847–1931) ia es un inventor american. El ia developa la bulbo de lus eletrical, un sistem de jenera eletrica, un aparato per rejistra sonas, e un projetador sinemal – de cual tota resta importante en la sosia moderna.

Naseda en Milan, Ohio, Edison ia comensa esperimenta con primadores e aparatos eletrical e macinal en sua jovenia. Cuando el ia labora como telegrafiste, el ia fa sua inventa prima per move mesajes a un linia nova, automatida sin operor. Sua reali grande ia es un macina per envia multe mesajes a la mesma tempo tra un linia unica. Sua inventa de la transmetador carbonal de telefon ia es esensal en la developa de la telefon, cual ia es plu tarda inventada par Alexander Graham Bell, un fisiciste american.

En 1877 Edison ia anunsia la fonograf prima. En 1879 el ia mostra a la popla la bulbo incandesente de lus eletrical. En 1882 el ia developa e fisa en New York City un sentro grande de potia eletrical, la prima en la mundo. En 1883 el ia oserva la flue de eletrones de un fileta caldida – nomida la efeto de Edison.

En 1888, el ia inventa la "cinetoscopio", la macina prima per produi imajes movente par un segue rapida de senas individua. El ia crea un pila per reteni la eletrica e un fonograf en cual la sona ia es gravada sur un disco en loca de un silindre. Par sincroni sua fonograf e cinetoscopio, el ia produi imajes movente e parlante a la ves prima en 1913.

En la Gera Mundal Prima (1914–18), Edison ia labora per la atas nesesada de gera.