Teto

De Vicipedia
Un teto de ardosia
Un teto de palia
Tetos de telias de arjila

Un teto es la covre sur un construida, incluinte la materiales e construis nesesada per suporta lo sur la mures de la construida o sur colonas o otra suportas. Lo furni proteje contra pluve, neva, lus de sol, estremas de temperatur, e vento, o alga de los. La cualias de un teto depende de la intende de la construida cual lo covre, la materiales desponable, la tradisiones local de construi, la consetas de desinia arcitetal, e la leges de la area.

La material de cual un teto es construida varia multe: folias grande de arbores como la banana, palia de spesies variosa, vitro, cupre, aluminio, concreta, telias de arjila, bitumen, catran, cauxo, spuma poliuretan, polivinil, ardosia, teflon, telias de lenio, etc.

La formas de tetos es ance variosa. Los pote es plata o inclinada. Tetos inclinada es la plu comun, e pote es de un inclina solitar, de du inclinas frontonida, o de cuatro inclinas sin frontones (o an tre inclinas con un fronton). Plu on ave tetos arcida, o cupolin. Plu, un teto debe ave partes ajuntada como lucarnos, o tetos du o tre o plu ajuntada a angulas e altias variosa de la teto xef.