Jump to content

Teraza (arciteta)

De Vicipedia

Un teraza es un area esterna, abrida, plata, e tipal levada en un jardin o parce prosima a un construida, o como un area simil sur un teto plata. Lo deriva sua nom de la teraza cultival, sur cual cultivores planta sur un serie de niveles taliada en un colina o an un monte. Orijinal, la teraza de esta article ia pote ave ance niveles, ma tipal multe min ca los en la montanias.

Terazas es usada xef per ativias de osio o recrea, como senta, pasea, o reposa. La parola aplica ance a un area levada a fronte de un construi o strutur monumental, cual es tipal atenida par usa un scalera grande e ensircada con balustres.

Terazas cultival pote es trasada a edas preistorial, ma terazas arcitetal es egal vea. Esemplos en Asia sude-ueste ia es trovada a Nahal Oren (un loca cultural natufian, 13,000 a 9,834 aec) a Tel Yarmut ((2700 a 2200 aec), e a Tel el-Umeiri (600 aec). Lo ia es sperdeda vasta tra la mundo. Per esemplo, terazas ia es usada sur la Isola Babeldaob en Belau en la Mar Pasifica.

Terazas ia es multe usada tra Elas en arciteta privata e publica, e terazas sur tetos pote es trovada a Knossos tan temprana como 1700 aec. Los ia es egal popular en la Impero Roman, spesial ante templos. Templos ia es terazida sur la isola de Djava per a min 800 ec, e la usa ia sperde a Camputxa, la prima construida a Bakong en 881 ec.

Terazas es comun usada per abitadas privata. En casas tradisional en Tai, la casa es construida sirca un teraza sentral. Un o plu cabanas es poneda sirca la borda de la teraza, sirca 40 sentimetres plu alta ca la teraza per furni bancas integrada per senta. La teraza es frecuente perforada en la sentro par un arbor, cual, con la tetos e mures, furni ombra e pote es decorada con boles grande e plata de seramica conteninte pexes e nimfeas o par plantas en vasos.

Retraeda de "https://lfn.wikipedia.org/w/index.php?title=Teraza_(arciteta)&oldid=35381"