Suzumiya Haruhi
Suzumiya Haruhi (en Japanes: 涼宮ハルヒ, Hepburn: Suzumiya Haruhi) es un serie de novelas lejera nion scriveda par Nagaru Tanigawa e ilustrada par Noizi Ito. Lo ia es publicida la prima ves en 2003 par Kadokawa Shoten en Nion, con la novela “La Melancolia de Suzumiya Haruhi”, e pos lo ia es segueda par 11 volumes ajuntada de novelas, un serie de televisa animada produida par Kyoto Animation, cuatro series de manga, un filma animada, du series animada de rede orijinal e alga juas de video.
Trama
[edita | edita la fonte]Kyon es un studiante sarcasmosa e astuta de Scola Norde en la site de Nishinomiya ci ia serca un vive estra-ordina, ma pos judi la idea como enfantin, aora el serca poca plu ca un vive normal. Ma en la scola, el fini amini con Suzumiya Haruhi, un sudiantesa estravagante ci senta a retro de el en la clase e ci sempre xerca ce fa la vive plu interesante per se, de ce fa sua capeles a modo nova cada dia de la semana, a ce xerca fenomenos e figures supranatural. Un dia, Kyon planta a la testa de Haruhi la idea de funda un club per engana en sua estravagantias, donce la xica institui un club nomida “Brigada SOS” (SOS団, Esu-Ō-Esu Dan), corti per “la Brigada de Suzumiya Haruhi per crese ajita tra la mundo” (世界を大いに盛り上げるための涼宮ハルヒの団, Sekai o Ōini Moriageru Tame no Suzumiya Haruhi no Dan) (en la paperes ofisial de la scola Kyon ia renomi lo a “Brigada de Servi Studiantes con Labora Dura per Fa la Mundo un Loca Plu Bon”) per investiga avenis misteriosa, e la xica ia enrola Kyon como un membro.
Haruhi pos poca tempo ia enscrive plu tre membros: un bibliofil silentosa Nagato Yuki, un timida e reservada Asahina Mikuru, e un studiante transfereda nonajitable Itsuki Koizumi. En la curso de tempo, esta membros revela a Kyon ce los es la tipos de persones estrema spesial cual Haruhi serca: Yuki es un interfas estrateran enviada par un mente coletiva; Mikuru es un viajor tra tempo enviada de la futur; e Itsuki es un persepor estrasensal ci labora per un sosia secreta. Cada de los ia es enviada par sua organizas corespondente per oserva Haruhi, ci no sabe ce el es un dio ci posese la capasia de crea e destrui la tela de realias a sua capris. Los potes de Haruhi ata sin ce el sabe cuando el desira forte per ce alga cosa aveni e cuando el es en un mal umor, e cada de la organizas crede ce si Haruhi aprende de sua potes o es posada a un umor tro mal, lo ta pote destrui la universo completa. Donce, la tre membros de la club, juntada con Kyon, labora per manteni la vive felis per Haruhi per preveni tal senario apocalisal, desemblada como atas de la Brigada SOS, e ance combate menasas esterna ci intende esplota Haruhi, en la mesma tempo forminte un alia como un bande de viles.
Medios
[edita | edita la fonte]La serie e sua adatas inclui:
- Novelas lejera, 12 volumes (2003-2020).
- Serie de cartunes, 20 volumes (2004-2013).
- Series de cartunes ladal:
- “La Melancolia de Suzumiya Haruhi-chan” (2008-2019).
- “La desapare de Nagato Yuki” (2010-2017).
- Antolojias de cartunes, 4 volumes (2009).
- Serie animada orijinal, 14 episodios (2006).
- Serie animada reradiada, 28 episodios (2009), inclui la serie presedente.
- Serie animada ladal “La Melancolia de Suzumiya Haruhi-chan” (2009)
- Serie animada ladal “Nyoro~n Churuya-san” (2009)
- Filma animada “La desapare de Suzumiya Haruhi” (2010)
- Dramas audio, 3 volumes (2006-2007).
- 10 juas video (2007-2012).