Sistem Internasional de Unias
La Sistem Internasional de Unias, internasional conoseda par la corti SI (de franses Système international d'unités), es la forma moderna de la sistem metral e la sistem de mesura la plu vasta usada en la mundo. Coordinada par la Ofisia Internasional de Pesas e Mesuras (cortida BIPM de franses: Bureau international des poids et mesures), lo es la sola sistem de mesura con state ofisial en cuasi cada pais en la mundo, empleada en siensa, tecnolojia, industria, e comersia dial.
| Simbol | Nom | Cuantia |
|---|---|---|
| s | secondo | tempo |
| m | metre | longia |
| kg | cilogram | masa |
| A | amper | corente eletrical |
| K | celvin | temperatur termodinamical |
| mol | mol | cuantia de sustantia |
| cd | candela | intensia de lus |
La SI conteni un sistem coerente de unias de mesura comensante con sete unias fundal, cual es la secondo (simbol s, la unia de tempo), metre (m, longia), cilogram (kg, masa), amper (A, corente eletrical), celvin (K, temperatur termodinamical), mol (mol, cuantia de sustantia), e candela (cd, intensia de lus). On pote usa la sistem per defini otra unias coerente. Estas es nomida unias derivada coerente, cual on pote sempre representa como multiplis de potias de la unias fundal. Dudes-du unias derivada coerente ia es furnida con nomes e simboles spesial.
On pote combina la sete unias fundal e la 22 unias derivada coerente con nomes e simboles spesial per espresa otra unias derivada coerente. Car la grandias de unias coerente conveni per sola alga aplicas e no per otras, la SI furni dudes-cuatro prefisas cual, cuando ajuntada a la nom e simbol de un unia coerente, produi dudes-cuatro unias ajuntada (noncoerente) de la SI per la mesma cuantia; esta unias noncoerente es sempre multiples e su-multiples desimal (pd potia de des) de la unia coerente.
La modo corente de defini la SI es un resulta de un move tra desenios a un formula sempre plu astrata e idealida en cual la realis de la unias es separada consetal de la definis. Un resulta es ce cuando siensa e tecnolojia developa, realis nova e superior pote es introduida sin la nesesa de redefini la unia. Un problem con modeles fabricadas es ce los pote es perdeda, danada, o cambiada; un otra es ce los introdui nonsertias cual no pote es reduida par avansas en siensa e tecnolojia.
La motiva orijinal per la developa de la SI ia es la diversia de unias cual ia emerji en la sistemes de sentimetre-gram-secondo (CGS) (spesial la noncoerentia entre la sistemes de unias eletrostatical e unias eletromagnetal) e la manca de coordina entre la disiplinas variosa cual ia usa los. La Confere Jeneral sur Pesas e Mesuras (franses: Conférence générale des poids et mesures – CGPM), cual ia es instituida par la Trata de la Metre de 1875, ia reuni multe organizas internasional per institui la definis e normas de un sistem nova e per normi la regulas per scrive e presenta mesuras. La sistem ia es publicida en 1960 como un resulta de un inisia cual ia comensa en 1948, e es fundida sur la sistem de unias de metre-cilogram-secondo (MKS) combinada con ideas de la developa de la sistem CGS.