Sindrom de Sjögren

De Vicipedia

La sindrom de Sjögren es un maladia autoimune en cual la selulas imunial ataca e destrui la glandes exocrinal cual produi larmas e saliva. El es nomida per un oftalmolojiste svensce, Henrik Sjögren, ci ia descrive prima la maladia.

Nove de des pasientes ci ave la maladia es femes, e la eda promedial de comensa es la fini de la desenio de 40, an si el pote aveni a cualce eda. Ave sirca 4 milion persones con esta maladia en la SUA.

La sindrom de Sjögren pote esiste par se mesma ("maladia de Sjögren prima") o el pote developa multe anios pos la comensa de un maladia reumatica asosiada como artrite reumatica, lupus, scleroderma, sirose bilial prima, etc ("maladia de Sjögren seguente").

La sintomes prima es la boca e oios seca. Plu, la sindrom pote causa secia de la pel, nas, e vajina, e pote afeta otra organos de la corpo, incluinte la renes, vasos de sangue, pulmones, figato, pancreas, sistem nervosa periferial ("neuropatia sensorimotor de asones distante"), e serebro.

No ave un remedia per la sindrom, e no ave un trata per repara la secreta glandal. En loca, trata es jeneral per la sintomes e la suporta. La pasiente pote usa larmas artifisial e siclosporin per supresa la inflama ce disturba la secreta de larmas. Alga medisines pote stimula flue de saliva. La dole de musculos pote es tratada par medisines antiinflaminte nonsteroidal. Per pasientes con complicas grave, corticosteroides o imunosupresantes pote es prescriveda. Final, alga medisines antireumatica pote es usada.