Sindrom de Guillain-Barré

De Vicipedia
Jump to navigation Jump to search
Un spirometre portable, usada per reconose sintomes de Guillain-Barré

La sindrom de Guillain-Barré (pronunsiada "Gilen-Baré") es un debilia de musculos cual comensa rapida, causada par la sistem imune danante la sistem de nervos periferal. La sintomes comensante es tipal cambias en sensa o dole con la debilia, comensante en la pedes e manos. Esta sperde comun a la brasos e torso, con ambos lados envolveda. La sintomes developa tra oras a semanas. Entre la fase acuta, la maladia pote es menasante de vive, con sirca 15% de persones developante debilia de la musculos de respira e nesesante venti mecanical. Algas es afetada par cambias de la funsione de la sistem de nervos autonom, cual pote resulta con nonormalias perilosa de la rapida de la cor e de la presa sangual.

La causa no es conoseda. La mecanisme fundal envolve un problem autoimune en cual la sistem imune de la corpo ataca erante la nervos periferal e dana sua isoli mielin. A veses, esta problem de imunia es comensada par un infeta o, min comun, par sirurjia o an un vasina. La diagnose es tipal par la sinias e sintomes, tra la esclui de causas alternativa, par esaminas de la condui de nervos, e la esamina de la fluente serebrospinal. On ave un cuantia de sutipos fundida sur la areas de debilia, la resultas de esamina de condui de nervos, e la presente de anticorpos spesifada. Lo es clasida como un polineuropatia acuta.

En persones con debilia sever, trata pronto con imunoglobulines intravenal, o par plasmaferese, con cura suportante, pote resulta en un bon recovre en la majoria. Recovre pote dura semanas e anios. Sirca un tri de persones developa alga debilia permanente. Global, moria aveni en sirca 7.5% de persones afetada. La sindrom de Guillain-Barré es rara, con sola un o du casos per 100,000 persones cada anio. Ambos sesos e tota areas de la mundo ave frecuentias simil de la maladia. La sindrom es nomida per la neurolojistes franses Georges Guillain e Jean Alexandre Barré, ci ia descrive lo con la dotor medical André Strohl en 1916.