Sesisme

De Vicipedia
Un sufrajeta arestada en London en 1914

Sesisme es prejudi o discrimina fundida sur la seso o jenero de un person. An si sesisme pote afeta cualcun, lo afeta xef e sistemal femes e enfantes fema. Lo ia es liada a stereotipos e roles e pote inclui la crede ce un jenero es superior intrinsica a la otra. Sesisme estrema pote causa molesta, menasa, viole sesal, e otra formas de viole.

Alga studias indica casos istorial en cual femes ia es tratada plu bon ca aora: la femes de Egipte antica ia depende de sua padres e frates, ma los pote teni propria e ia es permeteda per atende corte, incluinte como acusores; femes anglo-sason ia es comun donada prestijia egal. Ma la evidentes no suporta la idea ce multe sosias precultivante ia dona femes un state plu alta ca oji. Pos la adota de cultiva e cultures sedente, la conseta de la inferioria de femes ia es instituida. Esemplos de sesisme en la mundo antica inclui leges scriveda cual preveni femes de partisipa en la prosedes political; femes en Roma antica no pote vota o teni ofisia politica. Un otra esemplo es la testos cual empapa enfantes con la idea de la inferioria de femes; femes en Xina antica ia es enseniada la prinsipes confuziste ce un fem debe obedi sua padre en enfantia, sposo en sposi, e fio en viduia.

Sesisme ia pote es la impulsa cual nuri la prosedes contra sorsores fema entre la sentenio 15 e 18. En Europa temprana moderne, e en la colonias european en America Norde, alegas ia es declarada ce sorsores fema ia es un menasa a cristianisme. La sesisme de acel periodo ia ave un rol en la persegue de esta femes. En Malleus Malificarum (la marteli de sorsores), la libro cual ia ave un rol major en la xasas e probas de sorsores, la autores ia razona ce femes es plu probable praticante sorsoria ca omes, e ce:

Tota malia es ma peti cuando comparada con la malia de un fem ... Cual otra es un fem ma un enemi a amia, un puni nonevadable, un malia nesesada, un tenta natural, un desastre desirable, un peril de casa, un nosiva deletosa, un malia de natur, pintida con colores bela!

Sorsoria resta nonlegal en alga nasiones, incluinte Arabia Saudi, do lo es punable par mori. En 2011, un fem ia es destestida en acel nasion per sorsoria. La omisides de femes pos es acusada de sorsoria resta comun en alga partes de la mundo; per esemplo, en Tanzania, sirca 500 femes vea ia es matada cada anio seguente tal acusas.

Sposi[edita | edita la fonte]

Asta la sentenio 20, la lege de Britan e la SUA ia oserva la sistem de coverture, par cual, par sposi, la sposo e la sposa es un person par lege, cual es per dise ce la esiste legal de la fem es suspendeda en la sposi. Femes en la SUA no ia es definada legal como "persones" asta 1875. Un dotrina legal simil, nomida potia sposal, esiste su lege roman-nederlandes (e es ancora partal un lege en Suaziland oji).

Restrinjes a la diretos de femes sposida ia es comun en nasiones de la ueste asta alga decades pasada. Per esemplo, femes sposida en Frans ia oteni la direto per labora sin la permete de sua sposos en 1965, e en Deutxland, los oteni esta direto en 1977. En la eda de Franco, en Espania, un fem sposida nesesada la permete de sua sposo per emplea, posese de propria, e viaja a via de casa; lo ia es abolida en 1975. En Australia, asta 1983, la aplica per un pasaporto de un fem sposida ia debe es autorida par sua sposo.

Femes en alga partes de la mundo continua perde sua diretos legal en sposi. Per esemplo, regulas de sposi en Iemeni dise ce un sposa debe obedi sua sposo e no pote sorte de la casa sin sua permete. En Irac, la lege permete ce sposos "puni" legal sua sposas. En la Republica Democrata de Congo, la "codigo familial" dise ce la sposo es la xef de la casa; la sposa debe obedi sua sposo; un sposa debe abita con sua sposo a cualce loca ce el eleje per abita; e sposas debe oteni la autoria de sua sposo per inisia un prosede legal.

Abusas e discriminas contra sposas es comun fundida en acordas finansial como un dote o custa sposi. Esta interatas ata como un modo de controla la sposa; per esemplo, article 13 de la codigo de state personal (Tunisia) dise ce "la sposo no pote, con fali de paia de la dote, forsa un fem per completi (sesal) la sposi", cual sujeste ce, si la dote es paiada, viole sesal es permeteda.

La Organiza Mundal Contra Tortura (OMCT) ia reconose ce "la autonomia e capasia per parti de un sposo maltratante" como esensal per para maltrata de femes. Ma, en alga partes de la mundo, pos sposi, femes ave poca oportuna per parte de un sposo violente: oteninte un divorsa es multe difisil en multe judias car los demanda ce la fem demostra la fali en corte; plu, la atenta per separa par fato es anci no posible car leges esiste per preveni esta. Per esample, en Afganistan, un sposa ci departi de sua casa de sua sposo risca es prisonida per "fuji de casa". Multe paises cual ia es colonias brites, incluinte India, manteni la conseta de restora de diretos sposal, su cual un sposa pote es comandada per reveni a sua sposo; si el fali per reveni, el pote es cargada con despeta de la corte. Otra problemes es fundida sur la paia de la custa de sposi: si la sposa vole departi, sua sposo pote demanda ce el repaia la custa de sposi cual el ia paia a la familia de la sposa, e la familia comun no pote o no vole repaia lo.

Leges, regulas, e tradisiones relatada a sposi continua discrimina contra femes en multe partes de la mundo, e contribui a la maltrata de femes, spesial en areas relatada a viole sesal e a autodetermina regardante seso, la viole de cual es aora notada como un viole de la diretos de femes. En 2012, Navi Pillay, alora la Comisionor Alta per Diretos Umana, ia dise ce:

Femes es frecuante tratada com propria, los es vendeda a sposi, a contrabanda umana, a sclavia sesal. Viole contra femes ave frecuente la forma de viole sesal. Vitimes de tal viole es comun acusada de promiscua e cargada con culpablia per sua situa, cuando femes nonfertil es rejetada par sua sposos, familias, e comunias. En multe paises, femes sposida no es permeteda per refusa relatas sesal con sua sposos, e comun ave no vose regardante la usa de contraconsep... La serti ce femes ave autonima plen sur sua corpos es la pasea esensal prima a ateni egalia sustantial entre femes e omes. cosas personal - como cuando, como, e con ci los eleje per relatas sesal, e cuando, como, e con ci los eleje per ave enfantes - es a la cor de vive con dinia.

La vota e politica[edita | edita la fonte]

Jenero ia es usada, a veses, como un util per discrimina contra femes en la campo de politica. La vota per femes no ia es atenida asta 1893, cuando Zeland Nova ia es la nasion prima cual dona la direto a femes. Arabia Saudi ia es la nasion plu resente per estende la direto per vota a femes en 2011. Alga nasiones de la ueste ia permete ce femes per vota sola resente: Femes en Suiz ia gania la vota en elejes federal en 1971, e la canton Appenzell Innerrhoden ia es la canton final per dona la vota a femes en elejes local (ma sola en 1991, cuando lo ia es forsada par la Corte Suprema Federal de Suiz). Femes franses ia es donada la direto per vota en 1944. En Elas, femes ia oteni la direto en 1952. En Lictenstain, femes ia oteni la direto en 1984, tra un refere sur votas per femes en 1984.

An si cuasi tota fem ave la direto per vota oji, on nesesa plu progresa en politica. Studias ia mostra ce, en alga democratias, incluinte Australia, Canada, e la SUA, femes es ancora representada par stereotipos de jenero en jornales. Multe autores ia mostra ce la diferes entre la jeneros en la media es min evidente oji ca los ia es en la desenio de 1980, ma es ancora presente. Alga casos (pe, educa) va es probable liada con aspirores fema, en cuando otra casos (pe, impostas) es plu probable liada a omes. Plu, on ave plu asentua sur la cualias personal de aspirores fema, como sua aspeta e sua personalia, car femes es ancora representado como emosiosa e dependente de omes.

Sesisme en politica pote ance es mostrada en la nonegalia de potia per crea leges entre omes e femes. Lanyan Chen ia dise ce omes teni plu potia ca femes, e ata como la gardores de la porton de enata politica. La proportio de femes a omes en legerias es usada como un mesura de egalia de la jeneros en la Indica de Potia de Jenero de la NU e sua incarne, la Indica de Nonegalia de Jenero.

Emplea[edita | edita la fonte]

Sesisme en emplea refere a discrimina fundida sur la jenero de un person cual aveni en la loca de labora. Un forma de sesisme en emplea es discrimina de paia. En 2008, la Organiza per Coopera e Developa Economial (OCDE) ia trova ce, an si la proportios de emplea de femes ia es estendeda e la diferes entre omes e femes regardante diferes en emplea e paia ia decrese jeneral, femes ave, promedia, 20% min oportunia per es empleada e es paiada 17% min ca omes. La reporta dise:

(En) multe paises, discrimina en la mercato per laborores - pd, la trata nonegal de persones egal produinte sola car los parteni a un grupo spesifada - es ancora un fator esensal cual infla la diferes en emplea e la cualia de oportunias per emplea ... Evidentes presenteda en esta numero de la Vista de Emplea sujeste ce (en nasiones de la OCDE) sirca 8% de la varia en diferes de emplea entre la jeneros e 30% de la varia en la diferes de paia entre la jeneros en la mercato de laborores.

Lo ia ance trovada ce, contra la fato ce cuasi tota paises de OCDE, incluinte la SUA, ave instituida leges contra discrimina, esta leges es difisil per enforsa.

Femes ci entra grupos de labor xef mas pote esperi la consegues negativa de "cuotisme" (pe la emplea de un grupo peti de femes per finje egalia de trata): presa per esele, isola sosial, restrinje de rol. Cuotisme pote es usada per camofla sesisme, per manteni la vantaje de laborores mas, etc. No lia esiste entre la proportio de femes ci labora en un organiza o industria e la boni de sua situa ala. Iniora de casos sesiste pote mali la problemes de femes en sua emplea.

En la Survide de Valuas Mundal de 2005, persones ia es demandada si los opina ce labora per salario debe es restrinjeda sola a omes. En Island, la persento ci acorda ia es 3.6%. En Egipte, los ia es 94.9%.

Studias ia conclui ce, promedial, femes es paiada min ca omes tra la mundo. Alga persones razona ce esta es la resulta de discrimina vasta contra femes en emplea. Otras razona ce la difere es la resulta de elejes diferente par omes e femes, como femes valuante enfantes plu ca omes, e omes elejenta careras en campos cual paia plu, como comersia, injenia, e tecnolojia.

Eurostat ia trova un durante difere, promedia, entre jeneros de 27.5% en la 27 membros de la EU en 2008. Simil, la OCDE ia trova de empleadas fema (de tempo plen) ia gania 27% min ca omes corespondente en la paises de OCDE en 2009.

Estimas de la parte de la diferes en paia entre la jeneros cual es la resulta de discrimina varia. La OCDE ia estima ce sirca 30% de la diferes es contribuida par discrimina. Rexerca en Australia ia mostra ce discrimina causa 60% de la diferes. En studias esamina la diferes en la SUA mostra ce un parte grande de la diferes de paia resta nonesplicada, pos controla per fatores cual afeta paia. Un studia de graduadas de universia ia trova ce, cuando tota otra fatores afetante paia es controlada, la difere es 5% un anio pos gradua, e 12% pos des anios. Un studia par la Asosia American de Femes de Universias trova ce graduadas fema en la SUA ia es paiada min ca omes ci performa la mesma labora e studiante en la mesma campo en universia.