Selacanto
La selacantos es de la sola jenera survivente - latimerio - de la suclase actinistio, ordina selacantiformos. Sola du spesies survive, la selacanto de la Mar Indian ueste, e la selacanto indonesian. Los es plu relatada a pexes con pulmones e la cuadropedes (amfibios, retiles, etc) ca a pexes con pinas raiosa.
Selacantos es xasores noturna. Los come pexes par vaga en la corentes de la mar. Sua corpo es covreda con scamas cosmoide cual ata como armur. La scamas es composada de un strato de oso densa e un strato de oso sponjin, covreda par un strato de cosmin, un materia simil a dentin. La oios de la selancantos es multe grande, e la boca es multe peti. La oios es ajustada a vide en lus povre par selulas retinal cual asorbe xef la ondos corta de lus blu.
Los ave poca predores e abita profonda en la mar do la situa es multe stable. Sin multe presa per ajusta per survive, la rapidia a cual los ia evolui es multe plu lente comparada a otra organismes.
Selacantos no ave multe valua comersial (estra la desiras de rexercores, dirijores de museos, e coliores rica). Como un comeda, lo es cuasi sin valua, car sua texedas suda olios cual dona un sabor repulsante a sua carne. Ma la survive continuante de selacantos es menasada par la draga comersial en mares profonda, en cual la selacantos es caturada sin intende con otra pexes plu valuada.