Scarabe

De Vicipedia
Jump to navigation Jump to search
Un dinastino "Hercule"
Un scarabe sisindela
Un scarabe artreno
Un marieta

Scarabes es un grupo de insetos cual formi la ordina coleoptera, en la supra ordina endopterigota. Sua dui alas fronte es durida a portalas (caxas per la alas), cual distingui los de la plu de otra insetos. La scarabes, con sirca 400,000 spesies, es la plu grande de tota ordinas, e composa cuasi 40% de insetos descriveda, e sirca 25% de tota animales conoseda. Spesies nova es frecuente descovreda. La familia la plu grande (curculionidos o scarabes elefantin), con sirca 80,000 spesies, es un parte de esta ordina. Trovada en cuasi tota abitada estra la mar e la artica e antartica, los interata con sua ecolojias en modos variosa: Los come comun plantas e fungos, desintegra detrito de animales e plantas, e come otra nonvertebratos. Alga spesies es pestas seria per cultiveria (pe scarabes de potatos) e otras (pe marietas) come afidos, coxinilias, tripos, e otra insetos cual suca a plantas e dana cultivas.

Scarabes ave tipal un esosceleto multe dur, incluinte la caxala, an si algas como la stafilinidos ave corta portalas, e meloidos ave portalas plu mol. La anatomia jeneral de la scarabe es multe uniforma e tipal de insetos, ma on ave alga esemplos de novas, como ajustas en scarabes de acua cual pote trapa bolas de aira sua la caxala per usa cuando los tufa. Scarabes ave muta completa, con un serie de cambias notable e alga subita en la strutur de la corpos entre emerji de ovos e deveni un adulte pos un paso pupal cuasi nonmovente. Algas, como la lucanidos, ave un dimorfisme sesal marcada, con mases posesente mandibulas enorme con cual los luta otra mases. Multe scarabes ave colores briliante e motifes cual anunsia sua nosivia, e otras es no plu ca mimas de tal insetos. Multe scarabes, inclui los cual abita en locas arenosa, ave camofla efetosa.

Scarabes es importante en cultur umana, de la scarabe santa de Egipte antica, a la usa de los como insetos combatante per diverti e aposta. Multe grupos de scarabes es briliante e atraente e es colieda e esibida. Plu ca 300 spesies es usada como come, en la plu casos como larvas. Comun comeda es spesies como la larvas de la tenebrio e la dinastino. Ma la efeto la plu grande sur vive umana es como pestas per cultiva, orticultur, e cultiva de forestas. Pestas seria inclui la scarabe de coton, la scarabe de potatos, e la scarabe de pinos. La plu de scarabes no causa dana economial e multe, como la marietas e la scarabes santa, es beneficante par aida en la controla de insetas danante.