Sarcoidose

De Vicipedia
Jump to navigation Jump to search
radiogram mostrante la nodulos de sarcoidose

Sarcoidose (elinica: sarkoeides - "carnosa") es un maladia envolvente colies nonormal de selulas inflamada cual formi masas nomida granulomas. La maladia comensa tipal en la pulmones, pel, o nodos limfal. Afetada min comun es la oios, figato, cor, e serebro. Cualca organo pote es afetada. La sinias e sintomes depende de la organo envolveda. Comun, on ave no sintomes o sintomes nonseria. Cuando lo afeta la pulmones, on pote vide respira ruidosa, tose, respira laborosa, o dole de peto. Algas pote ave la sindrom de Lofgren en cual on ave febre, nodos limfal grande, artrite, e un eruta conoseda como eritema nodosa.

La causa de sarcoidose no es conoseda. Algas crede ce lo pote es la resulta de un reata imune a un causa como un infeta o cimicas en los ci es disposada jenetical. Los con membros de familia afetada ave un risca plu grande. Diagnose es fundida partal sur sinias e sintomes, cual pote es suportada par biopsia. Resultas cual indica sarcoidose inclui nodos limfal grande a la radis de la pulmon a ambos lados, alta calsio en la sangue, con un normal grado de ormon paratiroide, o alga grados de un enzima convertinte de anjiotensin en la sangue. La diagnose debe sola es fada pos escluinte otra causas posible de sintomes simil, como tuberculose.

Sarcoidose pote solve se sin cualce trata en alga anios. Ma alga persones pote ave un maladia sever o de dura longa. Alga sintomes pote es bonida con la usa de medisines antiinflamante como ibuprofen. En casos do la maladia causa problemes sinifiante de sana, steroides como prednison es indicada. Medisines como metotrexate, clorocuin], o azatrioprin pote a veses es usada en la eforta per decrese la efetos ladal de steroides. La risca de mori es entre un e sete persento. On ave un risca de min ca sinco persento ce la maladias reveni en algun ci ia ave lo a ante.

En 2015, sarcoidose pulmonal e maladias interstisial pulmonal ia afeta 1.9 milion persones global, e los ia resulta en 122,000 moris. Lo es la plu comun en scandinavianes ma aveni en tota partes de la mundo. En la SUA, la risca es plu grande entre persones negra ca en persones blanca. A plu veses, la maladia comensa en persones de 20 a 50 anios. Lo aveni plu en femes ca omes. Sarcoidose es prima descriveda en 1877 par un dotor medical engles Jonathan Hutchinson como un maladia nondolosa de la pel.