Salsa siracha
La salsa Siracha (Tai: น้ำพริกศรีราชา, nam phrik Siracha; Viet: Tương ớt Sriracha; speleda comun Sriracha ma es pronunsiada Siracha) es un salsa asian de txili, vinagra, sal, zucar e alio. Lo porta la nom de la contia Siracha, provinsia Chonburi, en Tai, cual es derivada de Sri Raja (re santa) en sanscrito.
Siracha en Asia sude-este[edita | edita la fonte]
En cocina tradisional tai, la salsa Siracha acompania frecuente platos de pexes. En Vietnam, lo es servida con talietas phở, talietas fritada, e roleta Nem rán.
Siracha en America[edita | edita la fonte]
En anios resente la salsa Siracha ia deveni multe popular en la SUA e Canada. La marca plu comun en la mercato nordamerican es la "salsa gal" fabricada par la Compania de Comedas Huy Fong (4800 rua Azusa Canyon, Irwindale, California 91706). Alga otras companias ance comersiali la salsa Siracha, ma cuasi tota supermercatos en la SUA vende la salsa de Huy Fong.
La salsa Siracha es trovada frecuente en restorantes xines, viet, tai, e panasian.
La compania Huy Fong ia es fundida en Los Angeles, California par David Tran (Trần Đức, 陈德/陳德), un inmigrante de Vietnam, pos el ia evade la comunistes viet en la desenio de 1980. La compania ia porta la nom de la barco taiuan Huy Fong (汇丰/匯豐, Huìfēng), la barco el ia embarca de Vietnam per el migra a la SUA. Tran ia es naseda en Sai Gon (aora la Site de Ho Chi Minh) en 1945 en la familia xines-viet con asendente de Teochew (广东省潮州市/廣東省潮州市, Chaozhou, Guangdong, Xina).
La fabriceria de Siracha Huy Fong es en la site de Irwindale, contia Los Angeles, en California.
En otobre 2013, la governa munisipal de Irwindale ia inisia un litiga contra Huy Fong, pos sirca 30 abitores de la site ia cexa ce la fuma de la fabriceria Siracha ia causa irita e maladia. La litiga ia es abandonada la 29 maio 2014.
La difusa BBC ia reporta en 2013 ce Huy Fong ia vende 20 000 000 botelas de la salsa en la anio 2012. En 2009, la jornal Bon Appétit ia clama la salsa la "Ingrediente de la Anio 2010."