R. Austin Freeman

Dr Richard Austin Freeman (11 april 1862 – 28 setembre 1943) ia es un scrivor brites de naras de detetor. La plu de sua naras releva la carater de Dr Thorndyke, un investigor forense. Multe naras de Dr Thorndyke inclui puntos de sabe siensal. Esta puntos es frequente arcana, ma autentica. Freeman ia usa sua esperia como un sirurjiste colonial per ajunta realisme a sua novelas.

La nara inversada

Freeman es reconoseda per inventa la nara de detetor inversada. En esta forma, la identia de la criminor es conoseda a la comensa de la nara. De alora, la nara foca a la detetor e sua atenta solve la caso. Esta forma inovosa ia apare prima con la publici de la nara Oscar Brodski en Pearson’s Magazine en novembre 1910. En sua esajo The Art of the Detective Story (La arte de la nara de detetor), Freeman ia scrive ce en la nara inversada “La lejor ia vide ja la fa criminal, ia conose tota sur la criminor, e ia posese tota la fatos. Lo ta pare ce on ave no cosa plu per dise, ma me ia calcula ce la lejor ta es tan ocupada con la crimin ce el ta fali persepi la indicas… La parte du, cual descrive la investiga de la crimin, pare como material nova a la plu de la lejores.”