Parla de Regensburg
La Parla de Regensburg ia es fada par la Pape Benedito 16 la 12 setembre 2006 e la Universia de Regensburg (Deutxland). Lo ia es titulida "Fida, razona e la universia - memorias e refletas". La parla es considera como un de la afirmas papal sur cosas mundal de la parla de 1995 par la Pape Joan Paulo 2 a la Nasiones Unida. Lo ia reseta criticas internasional.
En esta parla, la Pape, parlante en deutx, ia sita un pasaje sur islam fada a fini de la sentenio 14 par la imperor bizantian Manuel 2 Paleologo. Cuando la tradui engles de la parla de la Pape ia es estendeda tra la mundo, la sita ia es prendeda estra contesto e multe politicistes e gidores relijial muslim ia protesta contra cual los ia vide como un insulta a islam.
Protestas masosa ia aveni en paises muslim. La Pape ia dise ce el ia usa un sita cual no ia refleta sua propre punto de vide. Esta afirma ia es incluida como nota a pede en la testo ofisial de la parla cual ia apare en la paje ueb de la Site Vatican:
En la mundo muslim, esta sita ia es nonfortunosa comprendeda como un espresa de me ideas personal, tal creante un coleria comprendable. Me espera ce la lejor de mea testo pote vide direta ce esta frase no espresa me vide personal sur la Curan, per cual me ave la respeta debeda a un libro santa de un relijio grande. Sitante la testo de la Imperor Manuel 2, me sola ia intende desinia la relata esensal entre fida e razona. En esta punto me acorda con Manuel 2, ma no suportante sua polemica.
La comenta controversa ia apare en la testo scriveda en 1391 como un espresa de de la puntos de vide de la Imperor Manuel 2, un de la gidores cristian ultima ante la cade de Constantinopoli en manos osmanan en 1453, sur converti forsada, gera santa e la relata entre fida e razona. Esta pasaje ia dise:
Mostra me ance cual Muhammad ia trae cual ia es nova e tu va trova sola malia e nonumana, como sua comanda de estende par spada la fida cual el ia predica.
La Pape ia consulta ja un edita critica de esta dialogo en la orijinal elinica e un tradui franses.