Pape Joana

De Vicipedia
Jump to navigation Jump to search
La carte de la "papesa" (posible representante pape Joana) en la paceta de taroci de Visconti-Sfora, desiniada par Bonifacio Bembo, sirca 1450

Pape Joana (o Pape Joan; latina: Ioannes Anglicus; 855–857) ia es, seguente lejenda, un fem ci ia rena como un pape per alga anios en la eda medieval. Sua nara ia comensa en la sentenio 13 e pos alora ia sperde tra Europa. La nara ia es crededa par multe per sentenios, ma la plu de eruditas moderna regarda lo como un nara de imajina.

La plu de varias de sua nara ia descrive el como un fem talentosa e educada ci ia desembla se como un om, comun a la demanda de un amor. En la racontas la plu comun, par sua capasias, el ia leva tra la ierarcia de la Eglesa e ia es ultima elejeda como pape. Sua seso ia es descovreda cuando el pari en la curso de un prosegue, e ia mori pronto pos lo, par mata o par causas natural. La racontas dise ce prosegues de la eglesa plu tarda ia evita esta loca, e ce la Vatican ia sutrae la pape fema de sua listas ofisial e ia crea un rituo per serti ce papes futur ta es mas (suposada par proba per testiculos). En la sentenio 16, la Catedral de Siena ia esibi un busto de Joana entre otra papes, ma lo ia es estraeda pos protestas en 1600.

La arcivi de Jean de Mailly, scriveda sirca 1250, conteni la nota prima de un pape fema nonomida, e lo ia inspira alga plu recontas tra la anios seguente. La varia la plu popular e influente ia es lo cual ia es interpolada en la Chronicon Pontificum et Imperatorum ("arcivo de xefes de eglesa e impero") de Martin de Opava, plu tarda en la sentenio 13. Martin ia introdui detalias, incluinte ce sua nom de nase ia es Joan Anglicus de Mainz, ce el ia rena en la sentenio 9, e ce el ia entra la eglesa per segue sua amor. La lejenda ia es asetada jeneral como vera asta la sentenio 16, cuando multe debate entre scrivores catolica e protestante ia sujesta ce la nara ia es un fantasia. Scrivores ia nota la estende de la tempo entre la eda suposada de sua vive e sua apare prima en testos. David Blondel, la erudita protestante, ia mostra ultima la nonposiblia de la nara. Pape Joana es aora regardada como imajinal, an si la lejenda resta como un influe en representas cultural.