Paucituberculato

De Vicipedia
(Redirijeda de Oposum musaranin)

La ordina Paucituberculato conteni la ses spesies survivente de oposum musaranin: marsupiales peti e musaranin restrinjeda a la Andes en America Sude. On crede ce la ordina ia diverje de la linia asendente de marsupiales prematur. Tan resente como 20 milion anios ante aora, plu ca sete jeneros ia esiste en America Sude. Los abita la areas de foresta e erba de la Andes alta. Car otra insetivores es asente de America Sude, oposumes musaranin pleni la mesma nix ecolojial. Esta sujesta ce oposumes musaranin ia abita esta area cuando America Sude ia es un continente isolida.

Oposumes musaranin (ance nomida oposumes ratin) ave sirca la grandia de un rata peti (9–14 cm de longia), con membros plu peti, un beco longa e puntida, e un coda magra e capelosa. Los es jeneral carnivor: xasores ativa de insetas, vermas de tera, e vertebratos peti. Los ave oios peti cual vide povre, e xasa a la sera temprana e a note, usante sua oio per loca vitimas. Los pare vive la plu de sua vives en tuneles su la tera e en ruetas a la surfas.

Car los abita locas ru e nonasesable, los no es bon conoseda e es clasida como rara. Studias resente sujesta ce los es plu comun ca nos ia pensa.