Nivhi (lingua)

De Vicipedia
Jump to navigation Jump to search
Nivhis, seci salmones

Nivhi (o giliac) es un lingua parlada en Mandju Esterna, en la basin de la rio Amgun (un afluente de la rio Amur), longo la estendes basa de la Amur mesma, e a la dui norde de Sahalin. Sua parlores es conoseda como la popla Nivhi.

La cuantia de la popla etnica nivhi ia es cuasi stable per la sentenio pasada, con 4539 persones contada en 1897, e 4673 en 1989. Ma la cuantia de parlores nativa de la lingua entre estas ia cade de 100% a 23.3% en la mesma periodo, donce sola sirca un mil parlores nativa resta.

La popla ia es tradisional pexores, xasores, e elevores de canes. Los ia es seminomada, vivente prosima a la costas en la estate e inverni plu interna longo rietas e rios per pexa salmon. La area cual la popla abita es xef foresta taigal con invernos fri e nevosa, e estates temperada con covre minimal de arbores.

Nivhi es un lingua aglutinante e sintetica. Lo ave un sistem de casos developada e otra marcas gramatical, ma no seso gramatical. La ordina de parolas normal es sujeto-ojeto-verbo, ma la sujeto es comun ometeda en parla. Nivhi es notable per la grado alta de incorpora entre parolas. Per esemplo, morfemes cual espresa relatas spasial (afisas en otra linguas) es incorporada en la nomes a cual los relata. Parolas composada de radises fasil definada e morfemes gramatical produosa, la plu de cual es sufisas. Nivhi ave no ajetivos, ma en loca lo ave verbos cual descrive un state. On ave du tempos de verbos: futur e nonfutur. La forma nonfutur pote combina con averbos e usa contesto per indica la tempo plu esata.