Nicolas Donin

Nicolas Donin de La Rochelle, ia es un prete franses de la prima dui de la sentenio 13, convertida a cristianisme prosedente de la relijio iudi. El es xef conoseda par sua rol en la disputa de Paris de 1240, cual ia resulta en la arde de tota la libros de Talmud cual ia pote trova.

Donin ia es ja escluida de la geto de Paris par la rabi Yechiel de Paris ante tota la comunia e con la rituo tipal. Pos 10 anios vivente estra la comunia iudi, el ia es batizada e ia deveni fransiscan.

El ia partisipa en la persegue de la iudis franses cual ia aveni junta a la crusadas.

En 1238, el ia vade a Roma, do ia denunsia a la Pape Gregorio 9 35 articles de la Talmud como blasfemal contra cristianisme, spesial per duta sur la virjinia de Maria e la incarne divin de Cristo. La Pape ia envia a la autorias eglesal transcrives de la acusas par Donin e la ordina de colie tota la Talmud e depone en la moncerias dominican e fransiscan, per es ardeda si pos esamina los on ta confirma acel acusas.

La ordina papal ia es segueda sola en Frans, do en marto 1240 on ia ordina a la iudis a dona tota la Talmudes. La re Louis 9 ia demanda un debate entre la rabis plu importante (Yechiel de Paris, Moises de Coucy, Judah de Melun e Samuel ben Solomon de Château-Thierry) e Donin, cual ia aveni la 12 junio de la mesma anio. La rabis ia razona futil contra la acusas de blasfema e nonmoralia. La comision real ia conclui ce la libros ta debe es ardeda e, en 1242, des-du mil libros ia es ardeda, multe de los no esente la Talmud, ma cualce libro en ivri.