Moisme

De Vicipedia
Jump to navigation Jump to search
Mozi
Un mapa de la locas de nase de la filosofistes de la dinastia Zhou; la filosofiste moiste es indicada par la triangulos blu

Moisme (xines: 墨家, Mòjiā; "scola de Mo") ia es un filosofia xines antica de lojica, pensa razonante, e siensa developada par la eruditas academial ci ia studia su la filosofiste xines antica Mozi (sirca 470 aec - 391 aec), e sua libro "la Mozi". Lo ia evolui a la mesma eda como confuzisme, dauisme, e legalisme, e ia es un de la cuatro scolas de filosofia major de sirca 770 - 221 aec (en la periodo de primavera e autono e la periodo de statos gerante). En acel eda, Moisme ia es videda como un competor major de confuzisme. Moisme es cuasi estinguida par la legalistes de la dinastia Qin. An si sua influe ia dura, moisme ia desapare cuasi como un scola autonom.

Moisme es la plu bon conoseda per sua consetas de "cura nonpreferente" (xines: 兼愛, jiān ài; "ama/cura incluinte"). Esta ia es comun traduida como "ama universal", cual es malgidante car Mozi ia crede ce la problem esensal de eticas umana ia es un esede de prefere en compatia, no un manca de compatia mesma. Sua gol ia es la reevalua de condui, no de emosias o disposas.

La moistes ia formi un organiza political multe struturida cual ia atenta reali la idea los ia predica, la scrives de Mozi. Como confuzistes, los ia xerca emplea no sola per profita, ma ance per reali sua ideales de etica. Esta strutur political ia es composada de un rede de unias local en tota la renas major de Xina, composada de elementos de la clases e erudita e laborante. Cada unia ia es conduida par un juzi ("sisel"). En la unia, un stilo de vive frugal e asteninte ia es enforsada. Cada juzi ia encarga sua propre susedor. Moistes ia developa la siensas de governa e la construi de forti, e los ia scrive teses sur governa, de cultiva produosa a la leges de erita. Los ia es frecuente empleada par la multe renas gerante como conselores per la stato. En esta modo, los ia es simil a otra filosofistes e cavalores vagante de la periodo.

Moisme promove un filosofia de cura nonpreferante; pd, un person debe cura egal per tota otra individuas, sin regarda sua relata vera a el. La espresa de esta cura nonpartisan es cual determina si un om es un person virtuosa en la pensa de moistes. Esta promove de nonprefere ia es un blanco de ataca par la otra scolas de filosofia xines, spesial la confuzistes, ci ia crede ce, an si ama debe es nondependente, lo no debe es nondiscriminante. Per esemplo, enfantes debe ave ama plu grande per sua jenitores ca per stranjeres acaso.

Mozi es conoseda per sua insiste ce tota persones es egal meritante de reseta beneficas material e proteje de feri fisical. En moisme, moralia es definida no par tradision e rituo, ma par un gida moral coerente, simil a lo sujestada en utilitarisme. Tradision varia en cultures variante, e umanas nesesa un gida estra tradision per indica cual tradisiones es moral asetable. La gida moral debe, donce, coraji condui sosial cual masimi la usosa jeneral de tota persones en la sosia.

La conseta de Ai (愛) ia es developada par Mozi en la sentenio 4 como un reata a la idea de ama bonvolente de confuzisme. Mozi ia atenta repone cual es ia vide como la afisa esedente a familias e clanes de la cultur xines con la conseta de "ama universal" (jiān'ài, 兼愛). En esta crede, el no ia acorda con la confuzistes, ci ia crede ce lo ia es natural e coreta ce persones cura de persones diferente en grados diferente. Mozi ia crede ce on debe cura egal per cada person, pd on debe ofre ama sin espeta resiproci, no sola a amis, familia, e otra relatas confuziste. Plu tarda, en budisme xines, Ai ia es adotada per refere a ama, cura, e compatia, cual ia es videda como un desira fundal. En budisme, Ai debe es sin ego, cual es un parte clavin per la ateni de lumina spirital.

No como utilitarisme edoniste, cual vide plaser como un bon en moralia, bon en la pensa de moisme es ordina, ricia, e crese de la cuantia de popla. En la eda de Mozi, gera e famiones ia es comun, e la crese de popla ia es videda como un nesesa moral per un sosia armoniosa. Si la abitores es rica, los reprodui plu; plu abitores, alora plu produi e ricia, se la abitores ave multe, los ta es plu bon a lunlotra, etc. Contrastada con la ideas de Jeremy Bentham, esta ideas no es utilitariste car los no es edoniste. La resultas de moralia es dirijeda a la stato, e no a la plaser de la individuas.

Mozi dise ce, cuando un sosia funsiona como un organisme organizada, la dejetada e nonefetosa trovada en la state natur (sin organiza) es reduida. El ia crede ce desacordas es derivada de un asentia de uniformia moral trovada en cultures en la state natural, pd sin un defini de cual es bon e coreta (是 shì) e cual es mal e erante (非 fēi). Seguente Mozi, nos debe eleje xefes ci va ensirca se con seguores virtuosa, ci va alora crea un ierarcia cual armoni la shi e la fei. En esta modo, la governa deveni un util con autoria. Si la xefes en la ierarcia sosial conforma con la renor, ci es perfeta sedente a la sielo, conforma de parla e condui es espetada de tota persones. On ave no libria de parla en esta model. Ma, la elemento posible represante es oposada par la comunica obligada entre la popla e sua xefes. La popla es esijeda per reporta tota cosas bon o mal a sua renores. Moisme es oposada a cualce forma de agresa, spesial gera entre la statos. Ma lo es permeteda ce un stato usa forsa en defende nesesada.

Mozi ia crede ce la norma de encarga sua familia con encargas importante en la governa, sin regarda sua capasias, contra encarga los ci ave la capasias la plu bon per aseta esta encargas, ia restrinje movablia sosial. Mozi ensenia ce si un person es capas de susede a un taxe, el debe reteni sua posto, sin regarda de sua relatas. Si un ofisior no es capas, an si el es un relata prosima de la renor, el debe es basida, an si lo resulta en povria.

Un renor debe es prosima a persones capas, valua sua talentos e demanda frecuente sua consela. Sin descovre e comprende la talentos en la nasion, la nasion va es destruida. Istoria mostra mostra multe casos en cual un person es matada, no per sua debiles, ma per sua fortias. Un arco bon es plu difisil per trae, ma lo lansa alta; un bon cavalo es plu difisil per monta, ma lo pote porta multe pesas e viaja distante; persones con talento es difisil per maneja, ma los pote trae respeta a sua renores.

Lege e ordina ia es aspetas importante de la filosofia de Mozi. El ia compara la carpentor, ci usa utiles normida per completa sua labora, con un renor ci no ave cualce normas par cual el pote rena. La carpentor es sempre plu susedosa cuando el depende de sua utiles normida, en loca de sua emosias. Ironiosa, car sua desides afeta la destina de un nasion intera, lo es an plu importante ce un renor manteni un colie de normas, ma el no ave los. Esta normas no orijina de umanas, car nun es perfeta; la sola normas cual un renor usa debe orijina de sielo, si sola sielo es perfeta. La lege de sielo es ai, pd ama nonpreferente.

En un governa perfeta, en cual la renor ama tota persones bonvolente, e ofisiales es elejeda seguente un meritocratia, la popla debe ave unia en crede e parla. Sua intende orijinal en sua idea ia es per uni persones e evita la divide entre setas variosa. Ma, en un situa froda e tirania, esta instruis pote es usada per opresa. Si un renor no es virtuosa, sete desastres ta resulta per la nasion:

  • La renor iniora de la defende de la nasion, an si la palasios es lusosa;
  • Cuando atacada par stranjeres, nasiones visina no vole aida;
  • La popla es envolveda en labora nonconstruinte en cuando foles sin usa es recompensada;
  • Leges e regulas ia deveni tro pesosa, e on ave teme represante, la popla ia atende sola a sua propre benefica;
  • La renor vive en un ilude erante de sua propre capasias e la fortia de sua nasion;
  • Persones on no pote fida, es fidada, ma persones on pote fida, no es fidada;
  • On no ave comedas sufisinte; ministros no es capas de completa sua taxes; punis no trae teme e recompensa fali trae felisia.

Un nasion ci fasa esta sete desastres va es fasil destruida par sua enemis.

La mesura de la ricia de un stato, en moisme, es un caso de furnis sufisinte e un cuantia de abitores grande. Frugalia es crededa como la clave a este resulta. Cuando persones es sasiada par la sufisinte, los va es libre de labora esedente, de gera durante, e povria de un nonegalia de revenu. Esta va capasi la proportio de nases per crese. Mozi ia coraji ance ce persones sposi cuando ancora joven.

Renores de acel periodo ia dona punis e recompensas par normas ritual, en locas spirital importante, per gania la atende de esta spiritos e serti ce justi es fada. La respeta de esta spiritos ia es videda como tan importante ce la asendentes preistorial de la xines ia dona sua instruis sur bambu, tabletas, e petras per garantia ce sua desendentes futur continua obedi la comandas de sielo. En la instruis de Mozi, la sacrifia de boves e oveas ia es notada en tempos spesifada en la saisones de primavera e autono. Spiritos ia es descriveda como la spiritos de natur preesistente, o la spiritos de umanas ci ia mori.

La moistes ia presente polemicas contra rituos ornosa de funeras e otra rituos perosa, e ia clama per frugalia en vive e governa, ma no vide sacrifias spirital como perosa. Usante arcivos istorial, moistes ia razona ce la spiritos de persones matada sin razona ia apare en la pasada per ave sua venja. Spiritos ia es ance notada como apare per coreta otra atas de justa. Moistes ia crede en sielo como un forsa divin (天 tian), la burocratia sielal e spiritos cual sabe de la atas nonmoral de persones e puni los, corajinte virtua moral, e ia es cauta de la filosofistes plu ateiste de la eda, como Han Fei.

Mozi ia desacorda con la disposa a predeterminisme de la popla, e ia acusa la disposa de trae povria e sufri. Per declara contra esta disposa, Mozi ia usa tre sinias par cual on pote judi esta ideas:

  • Evalua los par esamina istoria;
  • Evalua los par esamina la esperias de persones comun;
  • Evalua sua usosia par aplica los en lege o politica.

Per soma, predeterminisme es un crede nonfidable, promoveda par los ci refusa aseta ce sua propre pecosia ia causa la difisilias de sua vives. Ricia o povria es direta corelatada con o virtua o pecosia, no con destina. Mozi ia nomi predeterminisme un eresia cual debe es destruida.