Moda elinica antica

De Vicipedia

La moda de elinica antica ia es vera simple e pratical, e alga persones de oji vide ancora lo como un moda multe bela e refinada.

No vestes survive de esta eda de istoria, ma multe descrives, scultas e desinias esiste ancora. On ia fa xef la vestes en sua propre casa, e los ia ave comun multe usas (como telas, per esemplo). An si la media e imajina moderna mostra vestes pur blanca, la elinicas antica comun ia prefere colores vivosa e desinias detaliosa.

La citon (χιτών) ia es un tunica per omes o femes. Lo es construida de un retangulo de lana o lino. La varia dorica ia cade de la spalas e ia es fisada par broxes, spinos, botones o cose. Femes ia usa comun un plia como los usa per la peplo (vide a su). La varia ionica ia es portada sin la plia, e ia es securida de colo a polso par alga spinos peti. On ia pote porta un sintur grande (un zoster, ζωστήρ) o spesa (un zone, ζώνη) sur la citon, su la seno o la taie. La longia de la citon ia es plu longa ca la altia de la person, tal ce la tela suprapasante ia es traeda a supra la sintur como un camisa laxe.

La peplo (πέπλος) ia es un roba longa per femes, comun fada de lana. Lo ia es un tubo de tela, de cual la parte alta ia es pliada en modo eversada asta sirca la media, tal ce la alta de la tubo ia estende asta la taie e la basa asta la talos. La roba ia es alora fronsida sirca la taie, e la alta (a la plia) ia es spinida a la spala par un brox.

A vese, femes elinica ia porta un banda sirca la senos su la tunica, e un xal ia pote es poneda supra la tunica. La himation (ἱμάτιον) ia es un capa longa, comun fada de lana, portada en tempos plu fria. Omes ia pote usa un capa plu corta. Omes (e a veses femes) ia pote usa un xapo. Estra la casa, on ia pote usa sandales o botas de cuoro.