Mitolojia de America Norde
La mitolojia de la popla orijinal de America Norde es composada de multe colies de naras tradisional asosiada con relijio de un perspectiva mitografial. Esta sistemes de crede inclui multe naras santa, la plu de cual es fundida profunda en Natur e es rica con la simblisme de saisones, clima, plantas, animales, tera, acua, sielo, e foco. La prinsipe de un Spirito Grande cual inclui tota, universal e omnisiente, con un junta a la Tera, naras de crea, e memorias coletiva de antesedentes antica es comun. Rituos tradisional de adora es comun un parte de asemblas tribal con dansa, ritmo, cantas, e transe (pe la dansa de Sol). Pos la domina par popla blanca de Europa, credes e rituos ia es comun combinada en alga modo con cristianisme, ma es ance comun colorada par la desira forte ce la blancas ta vade a via. En la sentenio 19, multe credes e rituos ia es proibida o an nonlegal. En la sentenio 20, on pote vide atentas a reclama la tradisiones vea. Si los (con la atentas a revive la linguas orijinal) va susede es ancora nonserta.