Mat Zemlya

De Vicipedia
Jump to navigation Jump to search
Un sculta de lenio de Mocox
Un model per broda con Mocox e sua du cavalos

Mat Zemlya, o Mocox, es un diva slavica notada en la Arcivo Prima, la protejor de la labora e destina de femes. El vijila la fili e texe, la sisoroni de la oveas, e proteje femes en pari. El ia es la sola diva de ci sua idol ia es erijeda par Vladimir la Grande en sua santeria a Ciiv con la figuras de otra dios major (Perun, Hors, Dajbog, Stribog, e Simargl).

Mocox sinifia probable umida. Sua nom es posible derivada de la mesma radis como la parolas slavica mocri ("moiada"). El ia orijina, posible, en la tribus uralica norde de la Rio Vogul, ci adora la divina Mocxa. O sua nom pote es orijinal de la parola proto-indo-european molgas, cual sinifia ance "moiada".

Mocox ia es un de la divines slavica la plu popular. El es un vagor e un filor. Sua sposos ia es probable ambos la dio de tona Perun e sua oposor Veles. El es ance la madre de la jemelos Jarilo e Morana. Indicas arceolojial de Mocox dati a la sentenio 7 aec. Tan tarda como la sentenio 19 ec, el ia es adorada como un donor de fertilia e la renor de mori. Adorores ia prea a rocas de Mocox, rocas grande en la forma de senos, cual ia ave potia sur la tera e sua popla.

Un mito clavin en mitolojia slavica es la batalia divin entre la dio de tona Perun e sua oposor, la dio Veles. Alga autores e rexercores crede ce la saisi de Mocox es la causa de la luta.

En la cristiani de la Rus de Ciiv, on ia ave avertis contra la adora de Mocox. El ia es reponeda par la culta de Maria la virjin e San Parascevia.

En Europa este, Mocox es ancora popular como la donor potiosa de vive e protejor de femes. Viletas es nomeda per el. El apare en broda, representada como un fema con manos levante e con un cavalo de arado a ambos lados. A veses, el es mostrada con la organos sesal de omes, como la divina cargada con la potia sesal de la mas. Trasas de Mocox es oji bon preservada en la toponimes variosa de paises slavica. En Slovenia, sua nom ia es conservada en la vileta nomida Macoxe, prosima a Ribnica, e ance en la Rio Mocox en la rejion Precmurje. En Corvatsce, prosima a Rieca es la vileta de Mocoxica, e prosima Dubrovnic, la vileta Macoxe, e ance la areas suburban de Nova Mocoxica e Stara Mocoxica. Un vileta prosima a Zagreb es ance nomida Mocos. En Bosnia e Herzegovina, prosima a la vileta Ravno es un colina nomida Mucuxina. E sude de Mostar es la colina Mucoxa.