Mary Baker Eddy

De Vicipedia
Jump to navigation Jump to search
Mary Baker Eddy
La Eglesa Prima de Cristo Siensiste

Mary Baker Eddy (16 julio 1821 - 2 desembre 1910) ia es la fundor american de la relijio la Eglesa de Cristo Siensiste, en England Nova en 1879. El ia funda ance la Christian Science Monitor, un jornal dial secular e ganior de la Premio Pulitzer, en 1908, e tre jornales relijial - la Christian Science Sentinel, la Christian Science Journal, e la Herald de Christian Siensa. El ia scrive multe libros e articles, de cual la plu importante ia es Siensa e Sania con un Clave a la Scrivedas Santa, cual ia vende plu ca 9 milion copias asta 2001.

Membros de la Eglesa Prima de Cristo Siensiste vide Eddy como la "descovror" de Siensa Cristian, e membros es donce conoseda como siensistes cristian o studiantes de siensa cristian. La eglesa ia es fundida per "onora la parolas e obras de Jesus Cristo" e "repone cristiania primitiva e sua elemento perdeda de sani". Siensistes cristian crede ce maladias pote es sanida par prea.

On ave diferes clavin entre la teolojia de siensa cristian e lo de cristiania tradisional. Membros junta se a un forma radical de idealisme filosofial, credente ce realia es pur spirital e ce la mundo material es un delude. Esta inclui la idea ce maladias es un era mental e no un desordina fisical, e ce persones malada no debe es tratada par medica ma par un forma de prea cual atenta coreti la credes cual resulta en la delude de maladia.

La teolojia de Eddy es nontrinialiste: el ia crede ce un trinia personal o corpal es tro sujestante de politeisme. Siensistes cristian vide Jesus como la "mostror de la via" entre umania e Dio, e vide siensa cristian como fundida sur la instruis e esemplo de Jesus.

Biografia[edita | edita la fonte]

Eddy ia nase Mary Morse Baker en Bow, Hampshire Nova. Sua padre ia es Mark Baker (morida 1865) un cultivor, e sua sposa Abigail Barnard Baker (Ambrose; morida 1849).

Mark Baker ia es un om multe relijiosa de la eglesa protestante congregaliste, un credor en la judi final e puni eterna, e con un umor combatente. La enfantes Baker ia erita la umor de sua padre, e ance sua bon apare, e Eddy ia es conoseda como la bela de la vila. Vive ia es spartan e repetente, con cada dia comensante con un prea longa e continuante con labora dur. La sola dia de reposa ia es soldi. An tal, Eddy ia es forte influeda par sua enfantia congregaliste.

Eddy ia es frecuente malada cuando un enfante, e ia sufri de un maladia de come, e posible de atacas de desmaia, cual ia pote es "isterica", pd plu mental ca fisical.

En la desenio de 1840, Eddy ia es mal afetada par cuatro moris: Sua frate Albert, ci ia servi como un ensenior per Eddy, ia mori en 1841. En 1844, sua sposo prima George Washington Glover ia mori pos sola ses menses de sposi. Alora, sua madre ia mori en novembre 1849, segueda tre semanas plu tarda par la mori de la prometeda, John Bartlett. En 1850, George, la sola enfante de Eddy, ia es prendeda de sua madre e enviada a via per es elevada par membros de la familia.

En otobre 1862, Eddy ia deveni un pasiente de Phineas Quimby, un sanor spirital de Maine, un relata cual ia continua per multe anios. Per 1859, Quimby ia lia sua ativias de sani con la cristo de la atesta nova. El ia nomi sua metodo de sani "la siensa de sania" e "la siensa de cristo", e ia usa la espresa "siensa cristian". Persones criticante de Eddy ia sujesta ce el ia fura tota de sua ideas de sua ensenior Quimby. De alora, Eddy ia abita con un relata o un otra.

Frank Podmore ia scrive:

Ma el ia es nunca capas de resta longa en un familia. El ia disputa con tota de sua ospitores, e sua departe de un casa ia es presededa en du o tre veses con un sena violente. Sua amis en esta anios ia es jeneral spiritalisme|spiritalistes]]; el ia pare como declara se un spiritaliste, e ia parteni en seanses. El ia es a veses encantada, e ia reseta "comunica spirital" de Albert, sua frate morida.

Un scrivor zelosa, el ia publica sua obras en 1875 en un libro nomida Siensa e sana, cual el ia vide como la libro de aprende de siensa cristian, pos alga anios de ofre sua metodo de sani. La publici prima ia es un mil copias, cual el ia autopublicida.

Eddy ia dedica la resta de sua vive a la funda de un eglesa, la scrive de la regulas de lo en la Manual de la Eglesa Madral, e la revisa de Siensa e Sana. Per la desenio de 1870, el ia dise sua studiantes, "Un dia, me va ave un eglesa de me mesma". En 1897, el e sua studiantes ia funda la Eglesa de Cristo, Siensiste. Sua studiantes ia sperde tra la pais, saninte e instruinte otras. Eddy ia autori esta studiantes per lista se como praticores de siensa cristian, en la jornal de la eglesa, la Jornal de Siensa Cristian.

Eddy ia mori a la sera de 3 desembre 1910 a sua propre casa a 400 Beacon Street, en Newton, Massachusetts. El ia es enterada a 8 desembre 1910 a la semetero Monte Auburn, en Cambridge, Massachusetts.

Referes[edita | edita la fonte]

Frank Podmore, Mesmerism and Christian Science: A Short History of Mental Healing, George W. Jacobs and Company, 1909