Maladia de mano-pede-boca

De Vicipedia
La boca de un enfante ci ave MMPB
La pedes de un enfante ci ave MMPB

La maladia de mano-pede-boca ("MMPB") es un infeta comun causada par un grupo de viruses. Lo comensa tipal con un febre e descomforta jeneral. Esta es segueda en un o du dias par puntos o bultos plana e descolorida cual pote boli, sur la manos, pedes, e boca, a a veses la gluteo e inguin. La sinias e sintomes desapare normal tre a ses dias pos esposa a la virus. La eruta desapare jeneral par se mesma en sirca un semana. la ungias de la manos e pede pote posible es perdeda alga semanas a ante, ma los va recrese ultima.

La viruses cual causa MMPB sprede par contata prosima personal, tra la aira par tose, e la feces de un person infetada. Ojetos contaminada pote ance sperde la maladia. Coxsackievirus A16 es la causa la plu comun, e Enterovirus 71 es la causa du plu comun. Otra varias de esta viruses pote ance causa la maladia. Alga persones pote porta e pasa la virus an si los no ave sintomes de la maladia. Otra animales no es envolveda. Diagnose pote comun es fada fundida su sintomes. A veses, un esemplo de la garga o feces pote es probada per la virus.

La lava de manos pote preveni la sperde, e los ci es infetada debe no vada a labora, scola, o otra ativias cual inclui contata con otra persones. No medisin o vasina es otenable, ma atentas a developa lo es continuante. La plu de casos no nesesa un trata spesifada. Medisin per dole como ibuprofen o un jel desensosi per la boca pote es usada. A veses, fluides intravenal es donada a enfantes ci no pote bevi sufisinte. Rara, meninjite o ensefalite pote complica la maladia.

MMPB aveni en tota areas de la mundo. Lo aveni comun en avenis peti en scolas per enfantes joben. Avenis grande ia aveni en Asia de 1997. Lo aveni la plu comun en la mensas plu calda. Tipal, lo aveni en enfantes ci ave min ca sinco anios, ma a veses lo pote aveni en adultes. MMPB debe no es confusada con la maladia de pede-e-boca o ungula-e-boca cual afeta per la plu parte sola bestias.