Maladia de Crohn

De Vicipedia
Foto de la interna de un colon afetada par la maladia de Crohn

La maladia de Crohn (ance clamada colite granulomosa) es un maladia inflamante de la intestinos cual pote afeta cada parte de la sistem gastrointestinal, de la boca a la ano, e cual pote causa un varia grande de sintomes. El causa prima dole adominal, diarea (alga veses sanguosa), vomita, o redui de pesa. Lo pote ance causa complicas estra la sistem gastrointestinal, como erutas de la pel, artrite, inflama de la oio, fatiga, e manca de consentra mental.

La maladia de Crohn es probable un maladia autoimune. Lo ave indicas de un lia jenetica, ma lo ave ance un composante ambiente, indicada par la numero grande de casos en la nasiones developada de la ueste. Ance, persones ci fuma developa la maladia tre veses plu comun. La maladia afeta entre 27 e 48 persones per 100,000.

La maladia de Crohn no ave un remedia, sirurjial o medisinal. Trata es restrinjeda a controla la sintomes, manteni la remete, e preveni la recore.

La maladia es nomida per gastroenterolojiste american Burrill Bernard Crohn ci en 1932, con du colaborores, ia descrive prima la maladia.