Maladia de Chagas

De Vicipedia

La maladia de Chagas (o tripanosomiase american) es un maladia de parasitos tropical, causada par la protista Trypanosoma cruzi. T. cruzi es comunicada a umanas e otra mamales par la insetos de la sufamilia Triatominae (familia Reduvide) – la "insetos asasinante" cual suca la sangue, tipal spesies de la jeneros triatoma, rodnio e panstrongilo. La maladia pote ance es sperdeda par transfusas e transplantas, la come de comedas contaminada par parasitos, e par la madre a sua feto.

La sintomes de la maladia de Chagas varia tra la curso de un infeta. En la fase acuta a la comensa, sintomes es jentil e produi comun no plu ca un infla local a la situa de la infeta. Esta fase responde a tratas antiparasital, e es remediada en 60 a 90% de casos.

Pos cuatro a oto semanas, persones con infetas ativa entra la fase cronica de la maladia, cual es nonsintomal per 60 a 80% de persones cronica infetada tra sua vive completa. La tratas antiparasital pare ance lenti o impedi la developa de sintomes en la fase cronica, ma 20 a 40% de persones cronica infetada developa ancora disturbas de la cor e sistem de dijesta cual menasa sua vive.

La tratas disponable a presente es benznidazole e nifurtimox, cual pote causa efetos tempora en multe pasientes, incluinte disturbas de la pel, la serebro e la sistem de dijesta.

La maladia de Chagas es trovada prima en la Americas, spesial en la campanias povre de America latina. Rara, lo aveni ance en la sude de la SUA.