Linguas tximacuan
La familia de linguas tximacuan es composada de un lingua estinguida e un lingua sever menasada, parlada en la norde-ueste de la stato Washington en SUA, a la Penisola Olympic. Lo es un parte de la sprachbund (area linguistica) mosan, e un de sua linguas es famosa per no ave consonantes nasal. La du linguas ia es tan prosima a lunlotra como engles e deutx.
La du linguas es tximacum (chemakum, chimakum, chimacum) e cuileute (quileute, quillayute). Tximacum es aora estinguida. Lo ia es parlada asta la desenio de 1940 a la lado este de la Penisola Olympic. La nom es un varia de un nom salix per la popla tximacum. cuileute es aora sever menasada. Lo es parlada par un poca persones sude de la Rio Makah a la costa ueste de la Penisola Olympic. Sua nom deriva de kʷoʔlí·yot', la nom de un vileta a La Push.
La linguas tximacuan ave colies de fonemes simil a otra linguas de la sprachbund mosan, con tre vocales, consonantes ejetente, consonantes uvulal, e aficantes ladal. Ma ambos linguas ave casos noncomun: tximacum ave no consonantes velal simple, e cuileute ave no consonantes nasal.