Linguas ioc-utian
Ioc-utian es un familia proposada de linguas en California. Lo es composada de la familias iocutsan e utian. An si la lias entre la du familias ia es notada en atentas per reconstrui sua protolinguas en 1986, la familia combinada ia es proposada e nomida par Geoffrey Gamble en 1991. Lo ia es plu suportada par Catherine Callaghan, ci ia suporta la esiste de la familia sur la funda de similes de vocabula, morfolojia, e fonolojia entre la protolinguas. Ma el e otras ia nota ce, an si la similes ia es notable, la evidentia presentada no es concluinte.
Seguente la proposa, la protolingua de ioc-utian ia es parlada par un grupo cual ia orijina en la Basin Grande a min tan temprana como 4500 aec. On ave un divide sirca 2500 aec, cuando la grupo parlante protoutian ia migra a California. Protomiuoc ia comense emerje en la area de la baia norde de San Francisco entre 1000 e 500 aec, e ia comensa sperde ueste e sude. Protocostanoan ia emerji en la baia este, fendinte de la grupo utian plu grande pos 1500 aec, si no plu temprana. La lingua cual ia resta en la Basin Grande ia deveni protoiocuts ante fendente gradal en la linguas variosa de la familia iocutsan, cual ia comensa migra a California. Ma otra rexercores ia proposa ce la distribui lingual pote es la resulta de un migra singular de parlores ioc-utian ci ia sperde plu tarde tra California.