Linguas ianomaman

De Vicipedia
Un mapa de la linguas ianomaman
  Ianami
  Uaica
  Sanuma

Ianomaman (Yanomaman) es un familia de linguas parlada par popla en Venezuela sude e Brasil norde-ueste. Lo es composada de sinco linguas, simil a lunlotra e a veses clasida como un continua dialetal:

  • Ianami (acc Ninam, Yanami, Yanami-Ninami) - 900 parlores
  • Sanuma (acc Sanumá, Tsanuma, Sanima) - 5,100 parlores
  • Uaica (acc Waiká) - 6,000 parlores
  • Ianomamo (acc Yanomamö, Yanomame, Yanomami) - 20,000 parlores
  • Iaroame (acc Yaroamë, Jawari) - 400 parlores

Fonolojia[edita | edita la fonte]

La linguas ianomaman ave un distingui entre vocales bucal e nasal, e tota vocales pote es nasalida. Si un vocal en un parola es nasalida, alore tota vocales pos lo es ance nasalida. On ave sete vocales fundal: a, e, i, o, u, ɨ (ance speleda y). En ianami, u e ɨ ia conflue.

Sintatica[edita | edita la fonte]

Linguas ianomaman es SOV (sujeto-ojeto-verbo), usa sufisas, e marca tipal la xef de un formula, ma ave ance elementos de marca de dependentes. Consetas ajetivin es espresada par verbos stante, cual segue sua nomes.

On ave sinco parolas de mostra cual es elejeda seguente la distania de la parlor e escutor e ance seguente la vidablia, un cualia compartida par otra linguas de Brazil, como la linguas tupian. Parolas de mostra, clase, cuantia (incluinte numeros) presede la nom xef.

La linguas distingui entre posese alienable e nonalienable, un cualia areal comun, e un sistem rica de clasintes de verbos - cuasi sento - e los es obligante e apare cuasi ante la radis de la verbo. La distingui entre "nos" incluinte e escluinte, an comun en linguas american orijinal, ia es perdeda en ianami e ianomama, ma es retenida en la otras.

La sistem morfosintatical es ergativa-asoluta, pd la sujeto de un verbo nontransitiva es marcada en la mesma modo como la ojeto de un verbo transitiva (asoluta), e la sujeto de un verbo transitiva es marcada diferente (ergativa). La caso ergativa es marcada par -ny. La verbo acorda con e sujeto e ojeto.

La lingua ianomami marca sua verbos con indicas de evidentia: atestada, deduida, reportada, e suposada. Otra membros de la familia ave min niveles. La ojeto de un verbo pote es asorbeda en lo, spesial si lo no es la foca.