Linguas formosan
La linguas formosan es la linguas de la abitantes orijinal de Taiuan, tota de cual es linguas austronesian. La abitantes orijinal reconoseda par la governa es sirca 2.3% de la abitantes de la isola. Ma sola un parte peti de los pote parla ancora sua lingua asendente. De la sirca 26 linguas, a min 10 es estinguida, 4 o 5 es cuasi mor, e tota otras es a un grado menasada.
La linguas de la abitantes orijinal de Taiuan ave un sinifia en linguistica istorial car lo es probable ce Taiuan ia es la loca de orijina de la tota familia de linguas austronesian. La linguas formosan conteni 9 ramos de la familia (seguente Robert Blust, 1999), con la un ramo restante conteninte cuasi 1200 linguas malaio-polinesian trovada estra Taiuan. An si otra linguistes no acorda con alga detalias de la analise par Blust, la teoria de la orijina en Taiuan es jeneral asetada. La teoria ia es fortida par studias resente en jenetica umana, cual suporta ance la natur matrilinial de la migras.
La plu de linguas formosan ave un ordina de parolas con verbo prima, VSO o VOS, con la eseta de alga linguas formosan norde, posible de la influe de xines. Esta ordina es ance trovada en la plu de linguas de la linguas malaio-polinesian. Tanan rukai es la lingua formosan con la cuantia la plu grande de fonemes con 23 consonantes e 4 vocales con contrasta de longia, en cuando Kanakanabu e Saaroa ave la cuantia la plu peti con 13 consonantes e 4 vocales. Esta coresponde ance con la linguas malaio-polinesian.
Fundida sur indicas resente en arceolojia e linguistica, Roger Blench (2014) pensa ce la austronesianes en Taiuan ia es un colie de migrantes de partes variosa de la costa de Xina este cual ia migra a Taiuan per 4000 ante aora. Estas ia inclui popla de la cultur longshan de Shandong, ci cultiva milio, la cultur dapenkeng de Fujian costal, ci ia es pexores, e la cultur yuanshan de Taiuan la plu norde, ci Blench sujesta pote es orijinada de la costa de Guangdong. Blench sujesta ce la migras ia parla linguas relatada ma no identica, e los ia ariva a Taiuan en migras multiple.
Tota linguas formosan es lente desapare e reponeda par xines putong de Taiuan. En desenios resente, la governa ia comensa un program de reintrodui de formosa en scolas. Ma la resultas de esta program es deludente. En 2005, per conserva la linguas formosan, la governa ia developa un sistem de scrive fundida a la alfabeta latina. Los ia ance institui clases e documentos de capasia per aida conserva.
Lista de linguas formosa
[edita | edita la fonte]
Lo es difisil per deside do on marca la borda entre un lingua e un dialeto, cual causa alga nonacorda entre espertas. La lista a su es lo de Robert Blust (1999), comun asetada como un model. Estas es la familias ante la coloni de Taiuan par la xines min sude:
- Tsouica (jala)
- Tsou
- Saaroa
- Kanakanabu
- Planos ueste (orania)
- Thao, acc sao: dialetos brawbaw e shtafari
- Planos sentral-ueste
- Babuza: dialetos taokas e poavosa
- Papora-hoanya: dialetos papora, hoanya
- Formosan norde-ueste (rosa)
- Saisiyat: dialetos taai e tungho
- Pazeh, acc kulun
- Atayalica (verde)
- Atayal
- Seediq, acc truku/taroko
- Formosan este (purpur)
- Norde (kavalanic)
- Basay: dialetos trobiawa e linaw–qauqaut
- Kavalan
- Ketagalan, o ketangalan
- Sentral (ami)
- Amis propre
- Sakizaya
- Siraya
- Bunun (verde pal)
- Rukai (brun pal)
- Dialetos diverjente mantauran, tona, e maga
- Puyuma (verde jalin)
- Paiwan (azul)
E, estra formosa:
- Malaio-Polinesian
Referes
[edita | edita la fonte]Blench, Roger (June 10–13, 2004). "Stratification in the peopling of China: how far does the linguistic evidence match genetics and archaeology?". Human migrations in continental East Asia and Taiwan: genetic, linguistic and archaeological evidence. Geneva.
Blust, Robert (1999). "Subgrouping, circularity and extinction: some issues in Austronesian comparative linguistics". In Zeitoun, E.; Li, P.J.K (eds.). Selected papers from the Eighth International Conference on Austronesian Linguistics. Taipei: Academia Sinica. pp. 31–94.