Lincoln, Nebraska

De Vicipedia

Lincoln es la capital de Nebraska. Omaha es la sola site en Nebraska cual ave plu abitores ca Lincoln. Lincoln es ance la capital de la contia Lancaster e la loca de la Universia de Nebraska. La cuantia de abitores de Lincoln ia es sirca 258,000 en la anio 2010.

Lincoln ia es fundida en la anio 1856 con la nom "la Vila de Lancaster". Cuando Nebraska ia deveni un stato, la plu de la persones de Nebraska ia abita a sude de la rio Plat, e la legeria de Nebraska ia eleje move la capital de Omaha (cual es a norde de la rio Plat) a la ueste e sude de la rio Plat. Lancaster ia es elejeda par la legeria como la capital nova.

La construida capital es un rascasielo covreda con un cupola de oro e un sculta, alta de ses metres, de un cultivor, seminte gran. Esta sculta es un monumento a la erita cultival de la stato. Leges de la site de Lincoln proibi la construi de construidas de altia plu o simil ca la capital. Par causa de esta lege, tota la construidas de Lincoln es min alta ca la construida capital. Donce la capital es vidable de un distantia longa.

La site de Lincoln es la loca de la stadio la plu grande de Nebraska e ance un de la stadios la plu grande de SUA e la mundo con un capasia de plu ca 90,000 oservores. Lo es un stadio de futbal american de la ecipo de la Universia de Nebraska, cual es clamada la "Nebraska Cornhuskers".