Leprosia

Un om de 24 anios con leprosia (1886)

Leprosia, ance conoseda como la maladia de Hansen, es un infeta longa par la bateria Mycobacterium leprae o Mycobacterium lepromatosis. Infeta pote causa dana a la nervos, la sistem de respira, la pel e la oios. Esta dana neuronal pote resulta en un manca de capasia de senti dole, cual pote causa la perde de partes de la partes de corpo periferial de un person par feris repeteda o infeta tra feris nonpersepida. Un person infetada pote ance esperia debilia musculal e vide povre. Sintomes de leprosia pote comensa en un anio, ma, per alga persones, sintomes pote prende 20 anios o plu per aveni.

Leprosia sperde entre persones, an si contata estendeda es nesesada. Leprosia ave un patojenia basa, e 95% de persones ci reseta M. leprae no developa la maladia. On crede ce la sperde aveni par un tose o contata con licuida de la nas de un person infetada par leprosia. Fatores jenetical e la funsiona de la sistem imunial influe la fasilia con cual un person developa la maladia. Leprosia no sperde en ensintia a la enfante nonaseda o par contata sesal. Leprosia aveni plu comun entre persones ci vive en povria. On ave du tipos xef de la maladia - pausibasilal e multibasilal, cual difere en la cuantia de baterias presente. Un person con la tipo pausibasilal ave sinco o min rejiones de pel ipopigmentida e nonsensosa, ma un person con la tipo multibasilal ave plu ca sinco tal rejiones de pel. On confirma la diagnose par trova basilos asida-resistente en un biopsia de la pel.

Terapia con multe drogas pote cura leprosia. La trata de leprosia pausibasilal es con la medisines dapsona, rifampisina e clofazimina per ses menses. La trata per leprosia multibasilal usa la mesma medisines per 12 menses. On pote ance usa un cuantia de otra antimicrobiales. La Organiza Mundal de Sania furni esta tratas sin custa.

Leprosia no es multe comunicable. Persones con leprosia pote vive con sua familias e vade a scola e labora. En la desenio de 1980, on ia ave 5,2 milion casos global, ma par 2020 esta ia diminui a min ca 200 000. La plu de casos nova aveni en 14 paises, con Barat represante plu ca un dui. En la 20 anios de 1994 a 2014, 16 milion persones tra la mundo ia es curada de leprosia. Sirca 200 casos per anio es reportada en la Statos Unida. Florida sentral ia representa 81% de casos en Florida e cuasi un de cada sinco casos de leprosia en la nasion. La separa de persones afetada par leprosia par pone los en leproserias aveni ancora en alga rejiones de Barat, Xina, Africa e Tai.

Leprosia ia afeta umanas tra miles de anios. La maladia reseta sua nom de la parola elinica λέπρα (lépra), de λεπίς (lepís; 'scama'), e la terma "maladia de Hansen" es nomida per la mediciste norsce Gerhard Armauer Hansen. Leprosia ia es istorial asosiada con stigma sosial, cual continua es un bara a autoreporta e trata temprana. On clasi leprosia como un maladia tropical desatendeda. La Dia Mundal de Leprosia ia comensa en 1954 per atrae atende a los afetada par leprosia.