Lego

De Vicipedia
Jump to navigation Jump to search
La logo de Lego
Un model de la Trafalgar Square, locida en Legoland de Windsor, England

Lego es un marca de juetas de construi cual es fabricada par la Grupo Lego, un compania privata con sua base en Billund, Danmarc. Lo es composada de bricetas de plastica, entretexable e colorosa, aora ance incluinte un colie de rotas e piniones, carateres umana, animal, e mitolojial peti, e multe otra partes e pacos per construi. Los pote es usada per construi veculos, construidas, robotes dirijable, etc. Cualce cosa cual pote es construida pote es desconstruida e usada per otra ojetos.

La Grupo Lego ia comensa fabrica la bricetas en 1949. De cuando, lo ia crea un varia con bricetas plu grande per enfantes plu joven, nomida Duplo. En la desenio de 1950, Lego ia comensa crea pacos en grupos con temas como esplora de spasio, la site, piratas, vicinges, casteles, e trenes. Plu resente, lo ia comensa produi pacos con temas de filmas, como Batman, Star Wars, Harry Potter, etc. Un tema plu inovante ia es Lego Technic, cual es plu avansada e inclui ideas de injenia, ia es introduida en 1977. En 1999, lo ia introdui Lego Mindstorms, cual inclui bricetas programable per crea robotes. Lego ia produi ance filmas, juas de computador, oto parces divertinte nomida Legoland con multe construidas modelinte sites famosa, e multe Lego Discovery Centers ("sentros de descovre") tra la mundo.

Asta julio 2015, 600 bilion partes de Lego ia es produida. En febrero 2015, Lego ia prende de Ferrari la reputa de "la marca la plu potiosa en la mundo" de Brand Finance.