Laton

Laton es un alia de cupre e zinco, en proportios cual pote es variada per ateni colores e cualias mecanical, eletrical, acustical e cimical diferente, ma cupre ave tipal la proportio plu grande, jeneral 66% cupre e 34% zinco. Usada de tempos preistorial, lo es un alia de sustitui: atomes de la du constituintes pote recambia lunlotra en la mesma strutur cristal.

Laton es simil a bronze, un alia de cupre cual conteni stanio en loca de zinco. Ambos bronze e laton pote inclui proportios peti de un varia de otra elementos, incluinte arsenico, plomo, fosfor, aluminio, manganes e silico. Istorial, la distingui entre la du alias ia es min coerente e clar, e museos usa cresente la terma plu jeneral "alia de cupre".

Laton es ja un materia popular tra longa per sua aspeta briliante simil a oro e es ancora usada per manicos de caxeta e manicos de porte. Lo es ance ja longa vasta usada per fabrica scultas e utiles par causa de sua punto de fonde basa, sua laborablia (e con utiles de mano e con turnadores e fresadores moderna), sua dura, e sua condutia eletrical e termal. Latones con plu contenida de cupre es plu mol e plu oro en color; a la reversa, los con min cupre e donce plu zinco es plu dur e plu arjentin en color.

Laton es ancora comun usada en aplicas do resiste a corode e frica basa es nesesada, como securadores, xarnieres, piniones, cosinetos, cartuxes, zipes, tubos, juntador de mangeras, valvas e liadores e asetadores eletrical. Lo es vasta usada per strumentos musical como cornos e campanas. La composa de laton fa ce lo es un sustitua favorable per cupre en joalas teatral, car lo mostra plu resiste a corode. Laton no es tan dur como bronze e donce no conveni per la plu de armas e utiles. Ance lo no conveni per usas maral, car la zinco reata con minerales en acua salosa, produinte cupre porosa; laton maral, con stanio ajuntada, evita esta, como ance bronze.

Laton es frecuente usada en situas en cual lo es importante ce sintiles no es produida, como utiles usada prosima a materias flamable o esplodente.