Lasca
Lasca es un varia de damas, inventada par la campion du de xace mundal, Emanuel Lasker (1868-1941). Lasca ia es derivada de damas e un varia rusce de damas nomida baxni ("tores"). Lasker ia deveni familiar de la jua de tores cuando el ia resta a la casa de D. I. Sargin, un istoriste, rexercor, e promovor de juas de table. Lasker, un campion de mundo, ia furni un nom bon conoseda per promove sua varia.
La jua es juada sur un table 7 par 7. Como en damas, la pesos es restrinjeda a la cuadros alternante, donce sola 25 de la 49 cuadros es usada. La pesos es nomida "soldatos", ma cuando un ateni la linia final, los deveni ofisiores, con la mesma capasia de res en damas engles, pd per move e salta a retro.
La difere major entre lasca e otra varias de damas es ce, en loca de sutrae pesos de la table cuando los es caturada, los es poneda su la peso cual ia salta los, forminte un colon de pesos. La colon es su la controla de la juor de ci la peso es a supra, e ave la capasias de move e salta de acel peso. Si alga peso salta la colon, sola la peso a supra es sutraeda per vade su la colon cual ia salta.
On ave alga otra cambias en la regulas ance. Catura es esijeda cuando posible. Esta sujesta ce un juor astuta pote forsa ce sua oposor catura alga pesos de sua color, e alora catura la peso de sua oposor de la alta de la tore, restante un colon potiosa composada de alga pesos de sua propre color.
Un juor gania la jua si tota la pesos de sua oposor ia es caturada, o la oposor no pote move, o la oposor resinia.