Karl Benz

De Vicipedia
Jump to navigation Jump to search

Karl Friedrich Benz ia es un injenior de autos e un desinior de motores (25 novembre 1844 a 4 april 1929). Sua motorcar de 1885 es la auto pratical prima. El ia reseta la patenta per la auto en 1886.

Karl ia nase a 25 novembre 1844 en Muhlburg, Baden-Wurttemberg, Deutxland, con la nom Karl Friedrich Michael Vaillant. Sua madre ia es Josephine Vaillant, e sua padre Johann Georg Benz, un locomotivor. Cuando Karl ave du anios, sua padre ia mori de pneumonia. Karl gania la nom Friedrich per onora sua padre.

An si los vive en povria, sua madre ia atenta dona un bon educa a el. Karl ia atende la scola de gramatica local en Karlsruhe e ia es un studiante talentosa. En 1853, con nove anios, el ia comensa a la liseo per siensa. Alora, el ia studia a la Universia Politecnical su la instrui de Ferdinand Redtenacher.

A 30 setembre 1860, a 15 anios, el ia pasa la esamina per entra la program per injenia mecanical a la Universia de Karlsruhe. El ia gradua 9 julio 1864, con 19 anios de eda.

Seguente sua educa formal, el ia labora como un desinior en un fabrica de balansas. Pos emplea a un compania de construi de pontes, el ia move a Wien per un periodo a un compania de construi de fero.

En 1871, a la eda de 27, Karl Benz ia alia se con August Ritter per comensa la Fonderia de Fero e Laboreria de Mecanica en Mannheim, plu tarda renomida la Fabrica per Macinas per Lata Metal.

La anio prima de la emprende ia vade mal. Ritter ia es nonfidable e la utiles de la compania ia es confiscada per detas. La problemes ia es solveda cuando Bertha Ringer, la prometeda de Karl, ia compra la asion de Ritter par usa sua dote.

A 20 julio 1872, Karl Benz e Bertha Ringer ia sposi. Los ia ave sinco enfantes: Eugen (1873), Richard (1874), Clara (1877), Thilde (1882), e Ellen (1890).

Karl ia susede en la developa de motores nove en la fabrica el e sua sposa ia posese. Per colie plu revenu, en 1878 el ia comensa labora a patentas nova. Karl foca sur la crea de un motor de du tempos usante gasolina. El ia completa lo a 31 desembre 1879, e ia es donada un patenta per lo en 28 junio 1880.

Karl ia pote mostra sua jenia tra sua inventas seguente cual ia deveni un parte de sua motor de du tempos. El ia patenta la sistem de regula de rapida, la inisia usante sintiles con un pila, la bujia, la carburador, la embraje, la engranador, e la radiador acual.

Un pasatempo continuante per Benz ia es la bisicle, e esta ia condui el a un repareria per bisicles en Mannheim, la propria de Max Rose e Friedrich Wilhelm Esslinger. En 1883, la tre omes ia funda un compania nova cual ia produi macinas industrial: Benz e Compania Rheinsche Gasmotoren-Fabrik, tipal clamada Benz e Compania. Cresente rapida a 25 empleadas, lo ia comensa produi motores statica.

La susede de la compania ia dona a Benz la oportun per labora a un caro sin cavalos. El usada la mesma tecnolojia per bisicles per crea un auto. Lo ia ave rotas de filo, con un motor de cuatro tempos entre la rotas posterior, con un inisia de enrola sofistica, e un sistem de redui caldia par vapor en loca de un radiador. El ia completa sua crea en 1885 e nomi lo la "Benz Patent Motorwagen". Lo ia es patentada a 29 janero 1886 como DRP-37435: "auto nurida par gasolina".

Lo ia es la auto prima cual ia es desiniada completa per jenera sua potia, e no sola un caro con un motor, la razona perce Karl Benz ia reseta la patenta e es videda como sua inventor.

La varia de 1888 temprana de la Motorwagen ia ave sola du engranas e no ia pote trepa colinas sin aida. Esta limita ia es coretida pos cuando Bertha Benz ia fa sua viaja famosa e ia sujesta a sua sposo la ajunta de un engrana tre per colinas. En la curso de la viaja, el ia inventa ance la freno cuxinida.

La viaja per un distantia longa par auto, prima en la mundo, ia es emprende par Bertha Benz usante un model tre. A la matina de 5 agosto 1888, Bertha - suposada sin la conose de sua sposo - prende la veculo a un viaja de 104 km de Mannheim a Pforheim per visita sua madre, con sua fios Eugen e Richard. En ajunta a trova farmasias per ajunta plu carburante, el ia repara problemes tecnical e mecanical. On de los ia es la inventa de cuxines per frenos; pos alga inclinas a su, el demanda de un sapator per cloi cuoro a la blocos de la frenos.

Cuando Bertha e sua fios ia ariva esta sera tarda, los anunsia la ateni par un telegram a Karl. Sua desira ia es ce el mostra la viablia de la auto per viaja, e per crea publicia. Oji, la aveni es selebrada cada du anios en Deutxland con un corsa de autos antica. En 2008, la Via Memorial de Bertha Benz ia es aprobada como un via de la "erita industrial de umania".

En 1894, Benz ia introdui la Benz Velo, cual deveni la produi prima de auto. La Benz Velo ia partisipa ance en la curso prima de autos, la 1894 Curso de Paris a Rouen, do Emile Roger ia fini a 14, pos covre la 126 km en 10 oras e un minuto, a un rapidia promedia de 12.7 km/ora.

La Benz Omnibus, construida en 1895 per la Netphener Compania. Lo ia es la bus prima con combusta interna. Ance en 1895, Benz ia desinia la camion prima con un motor de combusta interna en istoria.

La demanda per motores de combusta interna ia forsa ce Karl Benz ia grandi la fabrica en Mannheim. La compania ia crese de 50 empleadas en 1889 a 430 en 1899. En la anios final de la sentenio 19, Benz ia es la compania la plu grande en la mundo, con 572 unias produida en 1899.

En 1909, la Blitzen Benz ia es construida en Mannheim par Benz e Compania. La veculo ia ave un 21.5 litre, 150 kW motor, e a 9 novembre 1909, en la manos de Victor Hemery de Frans, la corsor a Brooklands, ia crea un recordo de 22.91 km/ora. La recordo no es esedada per ten anios par cualce otra veculo.

A 28 junio 1926, Benz e Compania e Daimler Motoren Gesellschaft (DMG) ia conflue per crea la Compania Daimler-Benz, onorante la model la plu importante de la autos DMG, la 1902 Mercedes 35 hp. (La nom "Mercedes" es de Mercédès Jellinek, con 10 anios, la fia de Emil Jellinek ci ia defini la spesifas per la model nova.

A 4 april 1929, Karl Benz ia mori a sua casa en Ladenburg a la eda de 84, de un inflama de la broncos. Asta sua mori a 5 maio 1944, Bertha ia continua abita en sua casa final, e membros de la familia ia abita lo per 30 plu anios. La casa es aora identifia como un loca istorial, e es usada per encontras siensal per un funda nonprofitante, la Funda Gottlieb Daimler e Karl Benz, cual onora Bertha e Karl per sua roles en la istoria de autos.

En 1925, Karl Benz ia scrive esta en sua racontas: "Sola un person ia resta con mea en la barceta de vive cuando lo ia pare destinada a afonda. Acel person ia es mea sposa. Con coraje e determina, el ia alti la velos nova de espera."

La casa final de Karl e Bertha Benz