John Steinbeck

De Vicipedia
Steinbeck en 1926

John Ernst Steinbeck (1902–1968) ia es un autor esuan e un ganior de la premio Nobel en leteratur. El ia descrive en sua obras la luta corajosa de la popla ci depende de la tera per sua modo de susta. El ia nase en Salinas, California. En La pastos de sielo (1932), un colieda de naretas descrivente un comunia de cultivores californian, Steinbeck ia trata prima la vive de omes laborosa e temas sosial cual es presente en la plu de sua obras.

Sua otra libros temprana inclui Tortilla Flat (1935, nomida per un distrito misera a la costa de California), En batalia dutable (1936) e Sur muses e omes (1937). La obra la plu famosa de Steinbeck es La uvas de coleria (1939; premio Pulitzer 1940), cual descrive sombre la familia de Joad abitante en la Bol de Polvo de Oklahoma, un area multe povre, e sua migra a California en la Depresa Grande de la desenio 1930. Otra obras es Cannery Row (nomida per un strada de fabricerias de botes de sardinas) (1945), A este de Eden (1952) e La inverno de nosa noncontentia (1961). En 1962, el ia scrive sua autobiografia Viajas con Charley: xercante America.

Steinbeck ia es un de la figures major en leteratur de la desenio 1930. El ia ave un tema sentral en la dinia cuieta cual el ia vide en la povres e la opresadas. An si sua carateres ia es trapida en un mundo cruel, los ia resta umanas nobil e eroin an en defeta. Steinbeck ia gania la premio Nobel en leteratur de 1962.