Jirafa

De Vicipedia
Jirafa

La jirafa (Jirafa camelopardale) es un mamal african de la grupo de ungulatos con ditos duable. De la animales esistente sur la tera, lo es la plu grande. La nom veni de la parola arabi الزرافة (ziraafa), e la nom siensal de la spesie refere a la marcas a sua pelo, cual sembla los de la leopardo, e sua fas, cual sembla el de la camel.

La pesia de un jirafa mas adulta es sirca 1200 kg, e lo de un fema adulte es 830 kg. Los ave entre 4,3 metres e 5,2 metres de altia, e la recordo per un mas es cuasi 6 metres.

La jirafa es relatada a otra ungulatos con ditos duable, como servos e boves, ma on ave un familia separada – la jirafidos – cual conteni sola la jirafa e sua relatada, la ocapi, e alga relatadas estinguida. La jirafa abita en la rejion de Txad en Africa sentral a Sudafrica, normal en la savanas, areas erbosa, e forestas abrida. Cuando comedas es rara, jirafas pote vade a rejiones con plantas plu densa. Los prefere rejiones con multe acasias. Los pote bevi cuantias grande de acua cuando lo es disponable, permetente ce los vive per periodos longa en rejiones seca.

La pelo de la jirafa es plen de antimicrobiales e antiparasitales cual ata como un defende cimical, e dona la odor tipal de la animal. A la min des-un cimicas odorosa esiste en la pelo. Car mases ave un odor plu forte ca la femas, naturalistes suspeta ce la cimicales ave ance un rol sesal.