Istoria temprana de India

De Vicipedia
Jump to navigation Jump to search

Sirca 1500 aec, un popla ci nomi se arianes (comun conoseda aora como la indoiranianes) ia invade la sucontinente de India, e ia comensa domina la plu de la popla orijinal, la dravidianes. La arianes ia parla un lingua relatada a la linguas de Europa ueste, e ia veni de la stepes rusce. Los ia porta con los lo cual es aora conoseda como la relijio vedica, cual ta resulta ultima en un serie de libros nomida la Vedas.

En cuando la arianes ia coloni la sucontinente, los ia developa la sistem de castas. La du castas la plu alta ia es intera composada de arianes: la kshatryas o gerores, e la brahmines o pretes. Su los ia es un grupo miscada de campaniores nomida vaishas, e la dravidianes dominada, nomida la shudras. An tota estas ia es la popla variosa de la junglas, e la sclavos de la dravidianes orijinal, ci ia es nomida la parias o escluidas. La sosia ierarcial ta resta ofisial asta la rena par la Impero Brites comensante en 1858. Ma lo continua nonformal an oji.

Sirca 500 aec, alga persones, en xercante per lumina, ta turba la sistem de castas. Prima, on ave Siddhartha Gautam, plu bon conoseda como la Buda. El ia predica un modo de vive stoica cual inclui un moralia e medita cual ta developa a la filosofia rica de budisme. La otra ia es Vardhamana, nomida ance Mahavira, e sua seguor Jina, ci ia crede ce sufri ia es causada par la misca de spirito con materia basa, cual debe es separada de lunlotra par juna, astenisme, e puria sesal. Sua credes ta deveni un relijio nomida jainisme..

En la sentenio de 300 tarda, la soldatos de Alexandro la grande ia colpa sur la porta de India, e ta resta un presente sinifiante en Bactria, un area alga norde-ueste de India mesma. Esta elinicas ta es la sola popla de la ueste ci ta adota budisme, e los ta ave un parte sinifiante en la introdui de budisme a Xina. A la otra fini de India norde, Chandragupta, re de Maghada (do Buda ia predica) ia institui la Impero Mauria, cual ia controla la plu de India norde.

India Vegetation Features IGI 1909 Atlas.jpg

Sua neto Ashoka (272 - 231 aec) es un de la persones la plu famosa en la istoria de India. Pos un batalias spesial sanguosa, el ia jura ce le no ta mata plu, e ia abrasa budisme. Entre otra cosas, el ia institui leges fundida sur budisme, e ia rejistra los sur colonas e monumentos tra India norde. El ia envia ance misionores tan distante a la ueste como Egipte e Elas, e sua efetos sur la pensa en la ueste es ancora no serta sabeda. Nonfortunosa, sua impero ia es divideda entre sua desendentes pos sua mori, e India ia deveni denova un pais de multe statos feudal peti.

La aveni major seguente veni sirca 50 ec, cuando la Yüeh-chih (un popla indoeuropean de Xina ueste ance nomida la tocarianes o la cuxanes) ia invade India de sua base en Bactria. Plu tarda, en 320 ec e durante asta 535, la Impero Gupta ta permete un renase cultural, incluinte un flori de poesia, drama, e otra leteratur. Comensa sirca 430 ec, la hunes ia comensa rode a la Impero Gupta asta sua cade. Esta ia es segueda par un otra periodo de imperos nondurante e statos peti.

De 700 ec, nos pote vide un cambia major en la sucontinente. Prima, budisme, la relijio dominante de India, ta es gradal espulsada par la casta brahmin e sua suportores, e sustituida par un induisme reviveda, an si conservaliste. Aveni du, la muslimes ta entra India de la ueste e estende se lente per rena sur la dui norde de la sucontinente, tan distante como Bengal, aora nomida Bangladex. En 1206, la Sultania de Delhi ia es instituida, un impero fundida sur teocratia muslim e la fortia de sua militar. An tal, India ia flori en esta periodo, e comersia con Asia sude-ueste ta estende grande. La Sultania ta dura asta 1526.

An con la rena muslim, la sistem de castas ia continua, ma aora con alga renores muslim a la culmina, e la indianes nativa ia resta povre par la impostas sever. La muslimes ia aseta la indus como "popla de la libro" (cual los clama iudis e cristianes en la ueste, car los comparti la mesma tradisiones biblial como la muslimes), ma sola si los ta continua en sua rol en sosia. Ma la muslimes ia vide budisme como menasante, e moncerias, templos, e libros budiste ia es destruida. Esta ia continua an a la presente, como mostrada par la destrui de scultas antica jigante de Buda en Afganistan par la Taliban en 1998.

En 1498, la portuges ia descovre un via par mar a India, sircoveninte la imperos muslim enemin blocinte la via teran, e ia institui la colonia comersial cual ta deveni Kolkata. En la sentenio de 1500, los ia continua par coloni Goa, Srilanca, Mumbai, e otra locas costal.

La mogules - con Babar, un desendente de la hanes de mongolia, como sua xef - invade India de sua fortres en Kabul (Afganistan), e ia defeta la sultan de Delhi. Par 1576, los ta prende tota de India norde. La mogules, an si muslim, ia es multe tolerante de la indus e an de la jesuitas, e ia presenta un Proclama de Tolera en 1583. Alga setas sinteseda ia developa en esta periodo, con la seta la plu famosa, Sicisme. La sices ia es fundida par Nanak (1469 - 1538), ci ia fonde islam e induisme e otra filosofias a un cultur relijiosa forte e egaliste, en cual cada om ave como sua nom familial "leon" e cada fem "prinsesa". An oji, la Sices furni la spina dorsal de la fortes militar de India.

La muslimes arabi e la mogules, an si los ia es stranjeres, ia trae un otra periodo de renase a India. Los ia fundi bibliotecas e universias, ia contribui multe a leteratur (inclui editas plu moderna de la testos relijiosa indian, e ia fundida un stilo nova de arciteta indian, con la esemplo grande, la Taj Mahal.

En 1612, un juor nova ia entra la jua: La brites prende la colonias portuges. Los ta ultima rena tota de India, e multe plu.