Isaac Asimov

De Vicipedia
Isaac Asimov

Isaac Asimov (2 janero 1920 - 6 april 1992) ia es un scrivor american e un profesor de biocimica a la Boston University. El es conoseda per sua libros de naras siensal e siensa popular. Asimov ia es un scrivor produosa ci ia scrive o edita plu ca 500 libros e aprosima 90,000 leteras e cartes postal. Sua libros ia es publicida en 9 de la 10 categorias major de la sistem de Clasi Desimal de Dewey.

Asimov ia scrive lo cual es nomida nara siensal dur. Con Robert A. Heinlein e Arthur C. Clarke, Asimov ia es videda como un de la "tre grandes" de scrivores de naras siensal en sua vive. La obra la plu famosa es la trilojia de la Foundation ("la funda"), cual ia gania un Premio Hugo solitar per "La Serie la plu bon de tota tempo" en 1966. Sua otra series major ia es la serie de la Galactic Emprire ("impero de galasia") e la serie de la robotes.

La "impero de galasia" es en un futur plu prosima de la mesma universo de la series de la funda. Plu tarda, con Foundation and Earth ("la funda e la tera)", el ia lia esta futures distante a la naras de robotes, creante un "istoria futur" coerente per sua naras, simil a los plu temprana introduida par Heinlein, Cordwainer Smith, e Poul Anderson. Asimov ia ance scrive sentos de naretas, incluinte Nightfall ("la comensa de note") cual ia es elejeda la nareta de siensa la plu bon de tota tempo par la Science Fiction Writers of America ("scrivores de naras siensal de america"). Asimov ia scrive ance la serie de Lucky Starr per jovenes, usante la nom falsa Paul French.

Asimov ia scrive ance misterios e fantasias, e multe libros siensal. La plu popular de sua libros siensal ia esplica consetas en un modo istorial, vadente a un periodo a la comensa de siensa. Esemplos inclui Guide to Science ("gida a siensa"), la trilojia Understanding Physics ("comprende fisica"), e Asimov's Chronolojia de Sience and Discovery ("cronolojia de siensa e descovre"). El ia scrive sur multe otra sujetos siensal e nonsiensal, como cimica, astronomia, matematica, istoria, relijio, e critica de leteratur.

El ia es presidente de la American Humanist Association (sosia de umanistes american). La asteroide (5020) Asimov, un crater sur Marte, un scola prima en Brooklyn, la robote umanin ASIMO par Honda, e cuatro premios per leteratur es nomida en sua onora.

Biografia[edita | edita la fonte]

Asimov ia nase en Petrovitxi, Smolensc Oblast, en la Uni Soviet entre 4 otobre 1919 e 2 janero 1920. Sua madre ia usa la data prima afin Isaac ia pote entra scola plu temprana, ma Asimov mesma ia usa la data du. Sua madre ia es Anna Rachel Berman, e sua padre ia es Judah Asimov, un familia de molinores iudi. El ia es nomida Isaac per la padre de sua madre, Isaac Berman. Plu tarda, e ia ave un sore Marcia e un frate Stanley.

La familia ia viaja a la SUA tra Liverpool a la RMS Baltic, arivante a 3 febrero 1923 cuando el ia ave tre anios. Car sua jenitores ia parla sempre ides e engles con el, el ia aprende nunca rusce, ma resta fluente en ides e engles. Cresente en Brooklyn, New York, Asimov ia instrui se mesma per leje a la eda de sinco.

Pos ce los deveni casida en la SUA, sua jenitores ia posese un serie de botecas de confetos en cual tota membros de la familia ia es espetada per labora. La boteca ia vende ance jornales, cual Asimov loda como un influe major en sua ama de la parola scriveda tra sua vive.

El ia atenda la City College de New York per alga dias ante ce el aseta un suveni per studia a Seth Low Junior College, un ramo de Columbia University en Brooklyn desiniada per asorbe alga de la studiantes iudi e italian ci ia aplica a Columbia, an si los ia es studiantes eselente, car los ia es proibida de atende Columbia como la resulta de limitas nonofisial de la cuantias de alga minorias. Asimov ia comensa studia zolojia ma cambia a cimica (car el no vole disesioni un gato). Pos Seth Low ia clui en 1938, Asimov ia reseta sua diploma laural de siensa a un ramo de Columbia en 1939.

Pos fali gania entra a un scola de medica, en 1939 Asimov ia aplica a la program de cimica a Columbia, do el ia completa sua diploma mestral en 1941 e sua diploma dotoral en 1948. Asimov junta la profesores de la Boston University School of Medicine en 1949.

Asimov ia sposi Gertrude Blugerman (1917-1990) de Toronto a 26 julio 1942. Los abita un aparte en Philadelphia cuando Asimov ia es empleada a la Philadelphia Navy Yard, pos cual el ia servi en la fortes armada per 9 menses. Los ia ave du enfantes, David (1951) e Robyn Joan (1955). Los ia separa en 1970 e Asimov ia reveni a Nova York. El ia sposi Janet O. Jeppson a 30 novembre 1973.

En 1977, Asimov ia sufri un ataca de cor. En desembre 1983, el ia ave sirurjia sur sua cor a la New York University Medical Center, e ala el ia developa VIU de un transfusa de sangue.

En 1984, la American Humanist Association (AHA) ia eleje el como la umaniste de la anio. El ia es un de la suscrivores de la Declara Umaniste. De 1985, el ia es la presidente de la AHA, un posto onoral. Sua susedor ia es la scrivor e sua ami, Kurt Vonnegut. Asimov ia es ance un ami de la creor de Star Trek, Gene Roddenberry. Asimov ia mori en New York a 6 april 1992.