Infeta

De Vicipedia
La parasito de malaria

Infeta es la invade de la texedas de un vivente par organismes cual causa maladias, sua multiplica, e la reata de la texedas a la organismes e la toxinas cual los produi. Maladias infetosa, ance nomida maladias transmetable o comunicable, es maladias cual resulta de infetas.

La organismes cual pote causa infetas inclui viruses, viroidos, priones, baterias, nematodos, artropodos como ticas, acaros, pulgas, e piolios, fungi como tinea, e otra macroparasitos como sestodos e otra elmintos.

La "ospitores" (viventes infetada) pote combata infetas par usa sua sistemes de imunia. Ospitores mamal reata a infetas con respondes inatada, comun inclui inflama, segueda par un responde ajustante.

Medisines spesifiada cual es usada per trata infetas inclui antimicrobiales, antivirusales, antifungales, antiprotozonales, e antielmintales. Maladias infetosa resulta en 9.2 milion moris en 2013 (sirca 17% de tota moris). La ramo de medica cual consentra a infetos es nomida "maladias infetosa".