Heraclito

De Vicipedia

Heraclito (540 – 475 aec) ia es un filosofiste elinica de Efeso, un site de Ionia (aora la costa ueste de Turcia). El ia atenta responda a la demanda "de cual cosa es la universo construida?" Sua responde ia es foco, o enerjia.

La multe cosas en la mundo veni de foco par condensa e deveni aira, alora acua, e alora tera. Esta prosede es ecuilibrada par rari, car la tera licuidi, alora vapori, e revade final a enerjia pur.

Esta idea de foco como la materia ultima ia gida a la idea de un universo plu dinamosa. Cambia, per Heraclito, es la sola constante. "Panta rei, ouden menei" – tota cosas core, no cosa resta – es sua dise la plu famosa. El ia dise ance ce no person pote sta en la mesma rio a du veses, car acua nova es sempre fluente.

Heraclito ia es simil a la dauisme de Xina. El ia crede ce, an si la realia ultima es Un, la mundo cual nos sabe es construida de duples, e cada polo de cada duple nesesa la otra polo: "supra" nesesa "su", "blanca" nesesa "negra", "bon" nesesa "mal", etc. E el ia vide esta oposantes como la fonte de armonia. El ia nota ce, sin estende la cordetas de un arpa a du dirijes oposante, on no pote crea musica.

Ance como la dauistes, Heraclito ia crede ce la modo de vive la plu bon es en armonia con natur. Ma el ia mori sola, a 70 anios, car el no ia gusta la acompania de umanas.